Ars moriendi

§ Hier af leestmen een verueerlic gruwelick exempel.

Exempel.

MEn leest datter eens ridderen of ander grote luden te strijde trecken souden ende begheerden horen laetsten dranc. datmen hem van eenre schoenre ioncfrouwen hant drincken soude gheuen in die minne van sinte gheertruden

§ Doe verkoren si een schone vrouwe ende deden hoer toe weten dat si tot hem comen soude. want si van hoer hant in sinte gheertruden minne begheerden te drincken. ¶ Doe die vrouwe dit vernam. doe vercleden ende vercierden si hoer alsoe wonderlike schoen als si alre best mochte. Doe quamen alle die ridderen tot hoer omme te drincken van hoerre hand. si schenckede hem allen te drinken ende si entfenck een yeghelick bisonderlinghe vriendelick in horen armen ende custe een eyghelick bijsonder voer sinen mont Ende doe si dit ghedaen hadden ghinghen si te strijde. ¶ Des nachtes daer nae doe si op hoer schone bedde lach ende soude slapen. doe verblijden si hoer van die grote schoenheyt hoers lichaems ende seyde teghens hoer seluen. Siet hoe genoechlick is mijn lichaem. ende hoe wonderlike schoen bin ic onder anderen vrouwen want al dese ridders hebben van mijnre hant begheert te drincken. want si en conden gheen vrouwe gheuinden die alsoe schoen ende alsoe ghenoechliken ende bequaem was als ick bin.

¶ Doe si dit gheseyt hadde. hoerden si alte hantes een stemme tot hoer. seggende. O hoe ligghestu hier onsalige wijf. Du hebste huden meer dan.ccc.sielen ghebrocht in de ewighe verdomenisse ouermits uwen ydelen ghelate van oncuusheyt. ¶ Want dese ridders dye wt uwer hant hebben ghedroncken dese zijn verslaghen ende die wrede duuelen hebben hoer sielen ghebracht in die ewighe pine. want doe si v aldus ydelic ende onmanierlick gheciert saghen hebben si altemael een doot sunde aen v ghedaen Want hoe ghi v aldus vutwenlick op gheproncket hadt teghens hoer doe begheerden si oncuusheyt mit v te doen. ende mit deze doot zunde zijn si ghestoruen ende ewelick daer omme verdoemt.

¶ Och hoe menich mensche moeten die ghene nu ter hellen brenghen die niet alleen op een tijt hem proncken voer den menschen als dit wijf dede. Mer alsoe langhe als si leuen proncken si hem alle

[fol. 68r]

daghen omme die menscheit te behagen. Och dese en ouerdencken niet dat si so menighe ewighe siele ter hellen brenghen daer si noch soe iamerlick omme ghepij moeten werden.¶ O hoe salich is die mensche die hem hier te tijde voer hoedet ende wachtet. Want voerwaer. oncuuscheyt verderuet den mensche opter eerden ende verdoemt hem oeck in ewichheyden. Want in deze tijt zoe crencket deze zunde der oncuusheyt des menscen lichaem. ende benemet hem sine crachte. Si breckt oeck dat ghesichte der oghen. si verblindet ende dodet menighen mensce Sij stoppet die sinne ende verstandenisse des menschen. si destrueert dat ghoede gheslachte. ende maect menighen mensce soe bose ende quaet die te voren goet was dat hi op god noch opten duuel en denct want zijne ghedachte en is anders nerghens op dan hoe hij dese quade sunde der oncuuscheyt volbrenghen mach ¶ Dese quade sunde brect oec die trouwe ende brenghet menighen mensche in enen quaden name ende in een quaet gheruchte Si dodet die siele ende maket van enen redeliken mensche een beest. Iae menich mensche is onreynre dan een beest want gheen dier en begheert mit sinen ghade te menghen nae dattet vrucht ontfanghen heuet. dan alleen die peerden. ende die menschen. Ende hier omme soe moet dese quade zunde der oncuusheyt nae der doot ewelick ghepinighet werden. als voerseyt is.

§ Hier af spreckt die heylighe man sinte Augustinus segghende. Cort is dye ghenoechte der oncuusheyt. mer hoer pijne en sal nummermeer eynde hebben. ende hoer pijne sal soe onuerdrachelic wesen datmense nummermeer ontgaen en sal moghen.