Ars moriendi

¶ Van dat wreede beeste daer die oncuusche menschen mede ghepinighet ende ghequellet werden.

VOert soe wort bi een yeghelicke oncuusche siele een verueerlic ende een groet dier gheleyt dat ghelijc is eenre padden. Dit dier is alsoe groet. als dat onuerdraghelike vuerighe bedde daer die sielen op ligghen. Sijn oghen bernen hem als eene vuerighe vlamme. ende gheuen altoes gruwelijke ende ontellicke voncken wt. Wt sinen nesen comt soe onlidelijcken roeck dat den vermaledijden sielen duncket dat si versmoren sullen ouermits den onlideliken roke

Het spuwet wt den monde dat helsche vuer. zijn vlammighe oghen keret totten vermalediden sielen ende siet also verueerlick oft die sielen te schoren soude.

Soe leyt die arme siele ende roept iamerlike. Och helpt mi ende verlost mij van dit verueerlike dier. Dan staen die quaede duuelen ende segghen. Wat seggestu nu is dit een lelic dier. dit is v vriendinne en v boel. doet v oncuusheyt hier nu mede. ghelijckerwijs als ghi op deser

[fol. 66r]

werlt pleecht te doen ¶ Och wat moghen dan die verdoemde vermaledijde sielen denken. och wat groter misbaer moeten si bedriuen in hulen. in carmen. Mer o laci ten mach hem niet helpen. want dit wrede beest noch oeck die duuelen en vraghen nae carmen noch nae roepen. Mer soe die sielen meer droefenisse hebben van roepen ende carmen. so die wrede duuelen den sielen meer pinen aen doen. Want soe si droeuigher zijn soe den wreden duuelen lieuer is.