§ Hoe die heylighen inden ewijghen leuen ghecroent werden
DIe vrienden godes werden ghecroent mit sonderlinghen costeliken cronen die claerder zijn dan enich cristal ofte enich dinck datmen bedencken mach. Si zijn verciert mit also costeliken stenen. die schoenre blincken dan die sonne blincken mach. Iae si zijn al soe schoen dattet gheen mensche begrijpen en mach
§ Hier af sprect sinte Iohan euangelist in apocalipsi segghende aldus Hoer cronen zijn blinckende claerre dan die sonne ¶ Och hoe mach dit yemant lesen of horen lesen die enich verstant heuet ende niet en versmaet de ongeuallighe tijtlike ghenoechte de so quaet is dat een mensche zijn ewighe salicheit daer mede verliest ende quijt gaet. O onsalighe vermaledide werlt hoe iamerlic verleydestu die menschen die in dij wonen. O mensche du die redelick ghecapen ende ghemaect biste naeden beelde ende naeder formen ons heren ihesu xpristi. hoe beestelick hebbestu di seluen nu ghemaect ouermits dijnen quaden zunden Och hoe iamerlick bistu bedroghen. o hoe heeft v die duuel beseten. Nummermeer en moeghestu in aldustanigen staet gode dienen. Mer o laci dine herten zijn alsoe versteent. datstu lieuer den duuel hebbeste te dienen ende hem nae te volghen dan gode dinen schepper die di ghescapen ende ghemaect heuet ende dij verlost heuet ouerts sinen duerberen preciosen bloede ende ouermits zijn heylighe passy ende martely die hi omme onse wille gheleden heuet
§ Och bistu aldus dwaes datstu lieuer den duuel dient die v myt onredelike pine louen sal dan dattu god dient de een loen geuet dat vol ghenoecht en blijscappen is ende dat ock nummermeer eynde hebben en mach. Och wat blijscappe ende wat ghenoechte sal den hylighen ons heren zijn dat si dese corte ongheuallighe ghenoechte ghescuwet hebben. ende wat groter droefenisse salt den verdoemden zijn dat si dese ghenoechte ende blijscappe opter eerden ghesocht hebben daer si soe iamerlick omme ghepinighet werden.
Auteursrechtvrij