Ars moriendi

§ Die blijscap der gheenre die dertenheyt ende ghemack versmaet hebben.

DIe deuote goede menschen. dye traecheyt tot goeden wercken ende tot gods dienste ghescuwet hebben nae horen vermoghen. Ende die oeck gemack ende dertenheyt versmaet hebben. Als in sachte te ligghen ende in langhe te slaepen ende in costelick ghecleet te gaen. Ende alle die ghene die dat rijcke godes ghesocht ende ghemint hebben wt alle haerre herten ende oetmoedich inden dienste gods gheweest hebben. Ende oeck alle die gheene die die heylighe daghen te recht geuiert hebben ende niet mit dansen noch oec mit springhen noch met ghenen anderen ydelen spelen toe ghebracht hebben. ¶ Dese werden gheloent met onsprekeliker ghenoechten ende blijscappen. Ia si zijn also vol vrouden datmen die vroude bij ghenen dinghen ghelijcken en mach

Want si zijn sonderlinghe verenighet met gode in een openbaer scouwen nae hoer verdienste. Mer die een meer dan die ander nae dat si verdient hebben

¶ Deser sielen glorie is alsoe groet ende onghemeten dat een yeghelike siele duncket dat si god alleen heuet ende alre meest van gode ghemint is ende alre meest van gode wtuercoren is Si laten hem duncken dat gheen heylighen inden hemelrike also

[fol. 46r]

grote vroude hebben en moghen als zy hebben. ¶ Want ghelikerwijs als si hem inder eerden ghesocht ende begheert hebben daer si hem niet vleyschelicke en mochten sien dan alleene in dat geloue daer si volcomelick in gheloueden ende leueden nae sinen gheboden. ende begheerden altoes sine minlike teghenwoerdigheyt ende zijn ghebenedide soete aensicht te sien

Hier hebben si vromelick inder eerden omme ghestreden ende gheuochten teghen hoer eyghen vleysche op dat hem dit geboren mochte te besitten ende te ghebruken in onsprekeliker vrouden. Mer nu hebben si vercreghen daer zij langhe omme ghearbeyt hebben. Want dat genoechlike hemelrike is hoer woenstat geworden ende mit xpristo zijn zij in ongemetenre vrouden ¶ Iae si vinden hem alsoe openbaerlick ende volcomelick inden hemele als hi op geuaren is mit lijf ende siele. ende sittet ter rechterhant zijns vaders.