Van Arent Bosman: een mirakel dat geschiede int jaar 1433 in den lande van Cleve

¶ Capittel xxv.

DOe sprac die geest ten anderen mael vraget mi nv Doe sprac arent met groter anxt. Waer hebstu dus lange gebleuen. ende wat is die grote claerheit Die geest antwoorde. watstu sietste dat is gracie ons heren ihū xpī Ic en mach mi niet meer openbaren als ic plach te doen Ic bin nv gecleet met witten clederen der ewijger vroechden ende ic ben gespijst voer den ewigen honger ende ben gelaeft voor den ewigen dorst Doe du ommekeerdes ende woudes thuis gaen doe was ic noch so verre van di als een sterc man soude mogen wanderen van adams tijden tot op desen dach toe. Ende ic was tot ander steden daer ic sach dat gebn̄dide ansichte ons heren ihū xpī ende ic sach oec alle dinc dat inden hemel ende inder aerden geschiede ende was nochtans so verre van tansicht ons heren ihū x̄pi als een starc man had mogen wanderen in al te veel iaren. ende en laet di des niet verwonderen want

[fol. d2r]

die rike man die inder hellen begrauen was sach lazarum inden hemel in abrahams scoet die op aertrike arm geweest hadde ende dat was een langer wech. Ende ic sach oec tot een ander stede alle bedroefnisse der sielen ende sach oec te gode waert alle vroechden Ende die bedroefnisse sach ic tot beiden siden bouen ende beneden ende die een tegen den anderen ende die was soe groot waert sake dat alder werelt wijsheit van adams tiden tot op dese tijt vergadert waren si en condense niet verstaen Ic sach dat ihūs xpūs gelijc was enen voorsichtigen rechtwiser dat hy alle dinc na recht wijsde Ende ic sach dat hi die luden die geestelic geweest hadden van aen beginne hoers leuens totten ende toe dat hy die settede int hoochste choer daer hi is Ende daer na settede hi die luden van state tot state na hoer verdienten ende deldese door die ix. choren der engelen Ende die luden van cleinre verdienten die houaerdich gheweest waren ende quamen met penitencie ten ewigen leuen die sette hi na hoer verdiente int nederste choer der engelen ende so oec metten kinderen die ionc gestoruen waren ende hebben dat heilige doopsel ontfangen die comen in dat nederste choor ende dien god hoger wil hebben in vroechden dien laet hi quelen ende grote pijn liden eer dat si steruen ende commen dan in hogher. vroechden. want die gheen

[fol. d2v]

sonde en heeft gedaen die en sal naden doot geen pijn liden mer hi moet alle pinen bescouwen eer hi te gode coemt. Ende so ist metten verdoemden zielen die sien eerst alle vroechden eer si in pine comen.