Van Arent Bosman: een mirakel dat geschiede int jaar 1433 in den lande van Cleve

¶ Capit. xvi

DOe vraechde arent of ic nu storue bin ic oec in sonden Die geest antwoerde wanneer die sonden ghebiecht sijn ende die mensche genoech daer voer wil doen soe sijn die sonden al bedect ende god en wilse niet openbaren daer om en can ic v daer of niet seggen So waer du niet met biechte of gesceiden en biste dat is condt inden hemel ende inder pinen Doe vraechde arent wat ist daer ic geen biechte of gesproken en heb Die geest antwoerde dattu dijn euen mensche belacht hebste ende des heiligen daechs gaeste callen om den kerckhof onder die misse ende datstu dijn couel hebste doen hacken Ende dattu des heiligen dages om byer

[fol. c1r]

pleges te spelen Ende noemde noch veel sonden die clein waren datse wonder waren vut te spreken nochtans meinde arent dat hi alle saken wel gebiecht hadde. mer wat arent ghebiecht hadde daer en conde die geest niet van spreken Doe vraechde arent waer ic oec sculdich te biechten die sonden die ic eens gebiecht hadde Die geest antwoerde Ya als die penitencie niet gedaen en waer Als die warrouwige mensch te biecht coemt ende heeft vele dootsonden gedaen ende biechtse een deel ende heeft die ander vergeten ende woudse gerne biechten of hise wist Dese mensche wert dan cleine penitencie geset ende lanc vageuier nader doot. Ist dat hi lange leeft dat hi veel guede werken doet ende geeft al missen ende gaet wel te kerken alle die tijt wort hem gerekent voor penitencie Ende wanneer daer aflaet op heiligen steden is ende op den kerchof daer mach een aflaet halen van sijn sonden als hem die heilige kerke seit