De Arabische Alkoran

In den name des barmhertighen ende goedigen Godts. XL. Capittel.

WIe Godt ghelooft, die sal wel gheloont werden, maer de ongeloovige sal Godt int verderven storten, ghelijck hy alle haer voor-vaders heeft gedaen.

Waer ghy 3. by malkander zijt, daer is God de vierde, ende waer vijf by malkander zijn, daer is Godt de seste onder u, ende alsoo voorder. De wijle Godt nu alle dinghen weet, soo sal hy oock alle wercken der menschen aen ’t licht brenghen, ende openbaren. Ghy en sult den Prophete gheen quaet na seggen, maer eerlijck van hem houden, ghelijck het in alles behoort.

De Duyvel beweecht de lieden daer toe dat sy vande menschen ende Propheten quaet spreken, ende daer deur brenght hy haer in zijn ghewelt, maer hy en soude dat niet konnen doen, soo het Godt niet toe en liete.

Wie by u begeert hooch te zijn, die sult ghy verhoogen, ende wie herberghe begeert die sult ghy herberghen, ende Godt sal oock alsoo met u doen: Ende ghy sult oock aelmoesse geven, maer die’t niet en vermach, die bidde des te vlijtigher. Gheeft trouwelick de thienden, want Godt vertoornt hem over de ghene die

[fol. 145]

hem wederstaen, ende die vanden wech Gods afwijcken, die sullen daerom sware straffe lijden moeten, ende en sullen haer met gheen ghelt konnen verlossen. De ghene die achterclappen, Godt wederstaen, ende den Prophete niet gelooven, die sullen vande alder-ellendichste lieden met voeten ghetreden werden, maer die Godt lief heeft, die vaert deur alles, ende ’t sal hem wel gaen, ende sal een eeuwighe wooninghe int Paradijs hebben.