In den name des barmhertighen ende goedigen Gods. XIII. Capittel.
DE verholentheden die in desen boeck begrepen sijn, die wysen de lieden op den rechten wegh, ende leeren dat Godt de ghene, die goet doet ytem de thienden ende almoesse geven, ghelooven den laetsten dag des oordeels, ende stadich op de rechte strate wandelen: sijn barmherticheyt bewijsen sal. Maer de ghene die de leugens gheloven, ende sijn geboden onghehoorsaem zijn, grouwsame pijne lyden sullen. Maer de belofte Gods luydet, dat de vrome sullen het Paradijs besitten, want hy heeft den Hemel, de Aerde, ende alles wat daer in is gheschapen, ende hy geneert ende voedet alles. De ongeloovighe en konnen niet bewysen, dat de gene die sy aen bidden alsulcke dingen doen konnen: want zy wandelen op louter dwaelwegen, maer Godt siet seer nauwe opder menschen wercken ende vergelt het alles. Bidt vlytich, sijt gheduldich, houdt u fijn ende eerbaer int gaen ende staen. Onder alle stemmen en is geen stemme arger als des Ezels stemme. Godt haet de roemsuchtighe ende bedriegers, want en siet ghy niet, dat God alle dingen t’uwen besten gheschapen heeft. Daer werden veel menschen gevonden die daer seggen, als men haer den rechten weg wijsen wil, dat sy de seckte ende harer voor-ouders volgen willen, maer wat sullen sy seggen op die tyt als haer de duyvel door sijn bedroch in ’t Helsche vyer storten sal. Onthout u vande verboden saken, ende en ghelooft der Goddeloosen redenen niet: want Godt weet aller Menschen heymelijckheyt.
Als men u vraeght wie dat Hemel ende Aerde geschapen heeft, so sult ghy antwoorden Gods wonder wercken en konnen niet beschreven werden, of schoon alle Boomen tot Schrijf-pennen waren, ende de gantsche Zee tot Inc, verandert waer.
Wt Gods bevel vaert men met Schepen op de Zee: De ongheloovige hebben haer stadich teghen ons geboden gheset. Maer vreest u voor den laetsten dach des Oordeels. En stelt u betrouwen niet op de verganckelicke Werelt, noch en gaet niet op de dwael-wegen, noch en twijffelt niet aen God, want geen mensche weet wanneer hy sterven sal, maer de alwijse Godt wetet alles volcomelick.
Auteursrechtvrij