De Arabische Alkoran

In den name des barmhertighen ende goedighen Godts. V. Capittel.

GHeluck ende heyl kome over de ghene die daer gelooven, Godt aenbidden, ende de kuysheyt betrachten. Wie een toe vertrout pant vlijtich bewaert, ende sijn toesegginghe houdt, die sal den Hemel besitten.

Wy hebben den mensche eerst vander aerden gemaeckt, van bloet, van zaet, beenen ende van vleesch, ende alle menschen moeten sterven, maer ick wil haer weder opwecken. Ick late water vanden Hemel regenen op dat allerley vruchten uyt der aerden wassen moghen. Wy hebben oock veel wonderbare dieren geschapen, die de menschen alles ten besten dienen. Wy hebben Noa bevolen dat hy tot de sijne segghen soude, bidt God aen, want buyten hem en is gheen ander, maer de ongeloovighe hebben Noa bespot, ende seyden, hy waer even een sulck mensche als sy, ende of daer schoon een Engel uyt den Hemel quame, ende haer sulcks aenseyde, so en willen zy dat niet ghelooven, ende hier op heeft ons Noa gebeden, dat wy doch dese spotterije wreken souden, ende wy bevolen hem doen dat hy soude een Arcke bouwen, die op den water lach, dat uyt Tamar vloeyt, ende in dese Arcke soude hy nemen allerley dieren, Mannekens ende Wijfkens, ende als dit gheschiet was, soo soude hy Godt daer voor dancken. Wy hebben tot veel ander volckeren boodtschappers ghesonden, maer sy hebben die selve bespot, ende gheseyt, zy sijn menschen, zy eten ende drincken als sy, ende haer predikinge vande doodt, ende opstandinghe en hebben sy niet ghelooft, maer hebben voor ghegeven wie haer ghelooft die sal ghewis verdoemt zijn. Dit volck seyde dat wanneer yemant ghestorven is, eenmael, soo en staet hy niet weder op, ende daer en is oock gheen ander leven dan dit tijtlijcke, ende hier op baden my de Propheten, dat ick dit weder-spreken soude, daer deur ick dan ben beweecht gheworden haer te verderven, ende ander volckeren in haer plaetse te setten: Maer de lieden hebben int gemeyn sulcke boodtschappers die ick tot haer ghesonden hebbe, weder sproken.

Pharao en heeft Mose ende Aaron niet willen ghelooven, hoewel sy zeer groote wonder wercken hebben gedaen.

Wy hebben den sone Marie selve een plaetse die seer waterrijck is, in gegeven met t’samen sijn Moeder Maria, om dat sy soo veel wonder wercken in de werelt ghedaen hebben.

O ghy bootschapper etet wat goet is, ende doet recht, want ick sie en wete het alles, ende draghe sorghe voor u.

De geloovige doen het ghene dat haer gheboden is, maer wiens herte verstockt is, die voert sijn sake slaperich uyt. Wy en legghen u niet op het ghene dat vremt is, maer wy gheven u die gheboden die u Vaders oock ghehadt hebben. En weet ghy dan niet wie uwe Prophete is, ende waerom naemt ghy sulcken, een verduyvelt mensche die u de Goddelijcke gheboden voorhout, ende ten waer gheen

[fol. 113]

wonder dat Hemel ende Aerde hier over verginghe, want ofmen al schoon dese lieden bekeeren wil, soo volharden zy doch in dwalinghe: Ende als wy ghenoechsaem haer misdaet vergheven, soo varen sy doch altoos voort in haer boosheyt. Godt heeft u ooren, mont, ende ooghen gegeven, dat ghy sien, spreken ende hooren kont: Maer weynich menschen dancken hem daer voor, hoe wel hy geeft leven ende doodt. Godt heerscht inden Hemel, waerom en vreest ghy hem dan niet, ende wy verkondighen u de waerheyt, ende ghy houdt u tot de leugenen.

Godt en heeft gheenen sone, of anders moeste daer een gheduerighe strijdt tusschen haer zijn, maer Godt heeft een grouwel van die lieden die dat segghen, bidde daerom Godt dat hy u voor sulcke redenen behoede, op dat ghy niet onder ’t getal van de Godloose gerekent wert, soo wil ick u leeren, welck ghebodt ghy sult houden, ende wil u voor de boose bewaren. Ten laetsten oordeele sal de Basuyne klincken, ende dan sullen alle menschen weder levendich opstaen, ende tot de Godloose sal de Heere segghen: Waerom en hebt ghy my niet ghelooft, ende waerom hebt ghy de ghene die aen my ghelooven versmaet ende bespot? Dan sullen sy segghen, dat zy dit uyt gheen boose meyninghe, maer onwetende ghedaen hebben, ende sullen Godt om ghenade bidden, maer Godt sal haer antwoorden, na dien sy zijn gheboden, maer voor spot ende fabel-werck ghehouden hebben, soo wil hy hen haren verdienden loon gheven, om dat sy dat hebben ghedaen: Want hoe, meynt ghy dat Godt u te vergeefs gheschapen heeft: Daerom lieve luyden vreest ende eert God, buyten welcke gheen ander God en is, ende ghy O Godt vergeeft ons onse sonden.