ghenoech ende vol op hebben: ende als sy in die selve Landen sterven, soo sal de barmherticheyt Gods met haer zijn.
Als ghy inden krijch treckt, so en wilt niet naelaten te bidden, want anders moest ghy vreesen, dat u vyanden u souden schaden. Ende als ghy met uwen Legher optreckt, so sullen sommige onder den krijchsvolcke bidden, ende sommighe sullen in haer wapens staen ende omwisselen, want het mochte anders, waer dese ordeninghe niet ghehouden werde, de vyant de overhant becomen, ende u het uwe alles wech rooven.
Ende als ghy alreede aen een sappige morassighe plaetse gheleghert sijt, soo en sal u niet seltsaems voor comen, als ghy maer wel toesiet, ende het zy dat ghy u nederlegt ofte opstaet, so roept Godt behoorlijcker wijse aen.
Ick hebbe u dit waerachtighe boeck vanden Hemel hier neder ghesonden, op dat ghy u selven daer uyt nae ’t vermoghen onser ordeninghe richten sout, ende alsoo zal Godt uwe sonden, ende alle u ander feylen vergheven. En bemoeyt u niet Godt voor alsulcke te bidden, die haer eyghen zielen schadelijck zijn: Want of ghy schoon in desen leven voor haer biddet, wie sal dan immers in ghenen leven aen haer plaetse teghen Godt disputeren, ofte wie sal hen helpen. Een yder hoer-eerder, ende sondaer als hy Godt bidt ende boete doet, soo vercrijcht hy de vergiffenisse zijner sonden, daerom wie sondicht, die en schadet niemant als hem zelven. De ghene die niet met woorden, maer met der daet de Wet verclaren, die sullen groote verdienst ende belooninghe hebben. Wie eenmael een onstraffelijck leven ghevoert heeft, ende hem daer nae in een roeckeloos leven begeeft, die sal grousaem ghestraft werden. Godt en vergeeft de doodt sonden niet, maer alleen de cleyne sonden, ende dat waerlijck wien hy wil.
Een yeder die inde plaetse Gods den Duyvel dient, die sal in openbare onghelucken gheraecken, want of schoon dese menschen veel beloven, soo en houden zy het doch niet, maer sulcke gesellen sullen aen een plaetse comen, daer zy gheenen uytganck te rugge hebben sullen, namelijck int helsche vyer, ende wie goet doen zal, die wil ick in’t Paradijs voeren, want het woort Godts is de waerheydt selve.
Wanneer een man ofte vrou-persoon, maer soo veel goets en doet, als een mostaertzaet groot is, soo en sal die van des weghen niet ongheloont blijven. Wie can een beter Wet vinden als die, dewelcke Abraham den ootmoedigen ende Godt vreesenden man is ghegeven gheworden,
Als yemant een wijf neemt, die een weese is, ende datmen haer het bestemt houwelijck goet niet en wil laten volgen, soo vintmen de verclaringhe hier van in desen boecke.
Doet recht den kinderen, ende alle ander weesen, want Godt heeft een waeckende ooghe hier op. Den man sal soo vele als het mogelijck is, met den wijve vreedsaem leven, ende als ghy onder uwe wijven gheenen vrede noch eendracht houden cont, soo sult ghy desen teghenwille soo veel het moghelijck is met ghedult verdraghen.
Wy bevelen alle de ghene die haer tot onse Wet voeghen, ende die bekennen, u, ende de uwe, dat ghy God vreesen sult, of anders sal hy als een Heere over alles, strenghe wrake teghen u oeffenen. Lieve luyden en gheeft gheen valsche, maer rechte ghetuyghenis: want Godt is een rechtveerdich richter, ende kent de ghene die niet oprecht en handelen. Ghelooft aen Godt, aen sijnen bootschapper, ende aen dat boeck dat u vanden Hemel ghesonden is gheworden.
De ghene die in’t eerste ghelooft ende
Auteursrechtvrij