De Arabische Alkoran

In den name des barmhertighen ende goedighen Godts. III. Capittel.

WY gheven onse Ziele Christo den sone Marie, ende gheven hem meer macht ende ghewelt als alle de ghene die wy hooch verheven hebben, ende waerlijck so hooch, dat zy oock met God hebben ghesproken. So Godt wilde soo en soude daer gheen oorloch sijn, daer nochtans nu over al twist ende oneenicheyt is. O Ghy vrome lieden hoort mijn gheboden, ende doet goet al eer dat dien dach comt aen den welcken gheen goet daer meer helpen sal. De ghene die dit niet en ghelooven, die sullen jammerlijck gepijnicht ende ghequelt werden. Ick ben alleen die levendige God ende Schepper ende daer en sijn geen ander Goden. Ick vercondighe u dat ghy wel sult toesien ende u vanden slaep niet en laet overvallen. Alles wat op aerden ende inden Hemel te vinden is, dat is van Godt, ende als hy niet en wil so en can niemant de eene voor de ander bidden. Hy weet wat teghenwoordich ende vergangen is, ende sijn wijsheydt cont ghy af meten aende betrachtinghe des Hemels: Daerom en doet gheen gheweldt: want alle goetheyt ende boosheyt comt in’t openbaer.

Wie niet aende Goden, maer aenden Schepper ende gheboden des alderwijsten Gods ghelooft, die is Godsalich, ende hy is uyt de duysternisse aen het licht ghevoert, of anders soo moet men in die eeuwighe Helsche verdoemenisse overblijven.

En is u die disputatie niet bekent die Abraham met een ander ghehadt heeft, want Abraham seyde Godt doodet ende maeckt weder levendich: Doen seyde die ander, ick can het oock doen, maer als Abraham seyde dat de Sonne deur de Goddelijcke macht vanden opganck totten neder ganck liep, soo is hy daer over verstommet gheworden, ende heeft stille ghezweghen.

Ende en weet ghy niet de Historie, dat als eene deur een verwoest Dorp wilde reysen, soo heeft hy Godt ghevraecht of hy oock dit Dorp wilde laten opbouwen? Daer op heeft God bevolen dat hy eerst hondert jaer doot soude sijn, ende na verloop deser tijt soo heeft hem Godt weder op gheweckt ende hem ghevraecht hoe veel jaren dat hy meynde hy hadde doot gheweest? Hy seyde, gheenen gantschen dach, maer alleen een cleyn deel van eenen dach, Doen seyde hem Godt dattet hondert jaren waren, ende beval hem dat hy ander volckeren sulcke wonder wercken soude vercondighen, ende hier op heeft dese mensche vry bekent, dat Godt alle dinghen doen can. Abraham heeft Godt noch eenmael ghevraecht op wat wijse hy de doode soude opwecken, doen heeft hem Godt geantwoort: of hy dan noch niet en gheloofde? Daer op seyde Abraham, ja ick geloove, maer ick begeer alleen van u te weten hoe ghy meucht mijn herte vast ende bestandich maken, ende Godt beval hier over den Abraham, dat hy vier Vogelen in cleyne stucken deelen soude, ende aen verscheyden plaetsen op den berch hier ende daer verstroyen soude, ende als hy die soude wederom begeeren, dat zy mochten te samen comen, so soude dat ghewis geschieden, ende dan sal hy bekennen dat Godt onbegrijpelijc ende alwetent is. Wie het zijne om Gods wille overgeeft, die is als een graen dat

[fol. 61]

seven ayren voortbrengt, ende een yeder ayre hondert granen heeft, want dewijle Godt almachtich wijs ende goedich is so beloont hy de sulcke dobbel, die hy lief heeft. Alle die haer ghelt inden wech Gods sonder gheveynstheyt ende pracht wtdeelen, die sullen sonder twijffel met Godt sijn, maer so het tegendeel geschiet so sullen sy daerom groote straffe ende pijne lijden moeten, want Godt weet alle heymelijckheden des herten.

O lieve menschen en doet uwe aelmoessen niet lichtveerdigher wijs, want die daer aelmoesse gheven, in meyninge om daer deur vande menschen groot gesien te werden, ende ten jongsten daghe Godt niet tot haren helper hebben aengheeroepen, die sijn als een lant vol edel gesteente, welcke met zandt ende stof bedeckt zijn: ende als daer eenen reghen comt so wert dat stof wech ghedreven ende men siet dan die edel ghesteenten.

Wie het sijne om Gods wille uytdeelt ende blijft bestandich inde oeffeninge van goede wercken, die is als een terwen graen, dat in een onvruchtbaer lant gheworpen wert, ende als daer eenen grooten regen comt, so brengt het vier dobbel vrucht.

Godt beloont de wercken soo wel der vromen als der boosen: En denckt maer alleen, dat wanneer yemandt een schoonen hof vol vruchten hadde ende die selve werde doort vyer gantsch verdorven ende verbrandt: wat souden sijn kinders daer toe segghen? maer nu heeft het een veel ander gheleghentheyt met den boosen, dat veel argher is, want die sullen ten jongsten daghe in’t eeuwighe vyer verteert werden.

En laet dese Goddelijcke Wet nimmermeer uyt uwe ghedachten comen, ende gheeft aelmoesse van alle ’tgene dat de aerde voortbrengt, maer wat op onrechtveerdiger wijse ghewonnen werdt daer van en salmen gheen aelmoesse geven, want sulcke gaven en sijn God niet aengenaem. De Duyvel beeldet u in, om gheen aelmoesse te geven, want ghy sout daer over in armoede comen, ofte sult ongherechticheyt bedrijven ende sulcks doen van boose gewonnen goet.

Godt vergeeft en deelt wijsheyt ende allen overvloet mede, ende deelt uyt die gave der bescheydentheyt wien hy wil: maer dese gave en wert niemandt mede gedeelt die een cleyn verstant heeft, maer die herssenen in de kop heeft.

Men hout het daer voor, dat aelmoes gheven een goet dinck sy, maer het is beter datment heymelijck als opentlijck doet, want daer deur werden de sonden uytghedelcht. Godt als een kenner der heymelijckheden, ende een alghemeyn richter, en sal niet alleen de bewesene goetdaden, maer oock diemen inden sin gehadt heeft te doen, beloonen.

De Goddeloose sullen hulpeloos ghelaten werden, daerom behoort het my alleen toe, ende niet u, den rechten wech aen te wijsen, die ick wil dat hy sal gaen.

Gheeft alle menschen aelmoessen die u bidden, van’t ghene dat ghy hebt, ende daer deur sult ghy u ziele helpen, want Godt sal een yder het sijne verghelden: ende in sonderheyt sult ghy sulcke arme goet doen, die haer aen eenighe plaetsen onthouden, ende haer schamen te bedelen ofte yet te begheeren, dese sijn noch eensdeels onder die van adel te rekenen, want dit behaecht Godt wel. In’t ghemeen sullen de ghene die daer heymelijck ende openbaer aelmoessen gheven om Godts wille, by daghe ende by nachte ghenaede ende barmherticheyt vercrijghen, ende en sullen haer noch in dese, noch in gene werelt te vreesen hebben. De ghene die haer met woecker gheneren, die sullen opstaen als de Duyvelen, ende sullen segghen, het sy haer coopmanschap geweest ende haren handel: maer Godt sal segghen, het sy haer verboden geweest. Wie

[fol. 62]

van sonden aflaet ende die selve betreurt, die is versekert dat hem die voorleden sonden vergeven zijn, maer als hy hem weder in sonden verdiept, soo en sal hy daer niet weder uyt comen, maer oneyndelijck in’t eeuwich vyer ghequelt werden: Want Godt heeft een afgrijsen daer voor, ende hy laet een sulck mensche te gronde sincken, ghelijck alle ander ongeloovighe. Maer wat de aelmoesghevers ende goetdaders belangt, soo heeft Godt die selve lief, ende deelt haer oock rijckelijck allerley gaven mede, als de gene die daer gelooven, geerne bidden, ende Godt schuldighe gehoorsaemheyt bewijsen.

Daerom beminde lieden vreest Godt ende en woeckert niet, of anders sult ghy den Toorn Gods ende sijns Propheten voelen: Ende als ghy yemant wat leent so en neemt niet meer weder als het cappitael ofte hooft somme. Ende als u die schuldenaer niet en can betalen, so wacht so lange tot dat hem de gelegentheyt ende t’ vermoghen by hem presenteert, ende onder desen bewijst hem alles goets ende geeft aelmoessen. Vreest u voor den dach aen den welcken ghy voor Godt sult moeten verschijnen, want op dien selven dach sal een yder na sijn mate den loon ontfanghen.

Als ghy yet coopt so sal daer een Notarius ende getrouwe ghetuyghe teghen woordich sijn, die niet daer toe en set noch daer van doet, ofte eenige valsheyt in menghe, ende als het niet te samen op het pampier en can ghebracht werden, so sal daer een ander ghetuyge ofte twee oprechte Vrou-persoonen by zijn, op dat sy connen getuyghenis gheven, als daer erghens in eenige strijdicheyt soude voor vallen. Als daer in eenen coop ghewisse termijnen ende bestecken af ghehandelt werden (want anders en is het niet noodich) soo sal daer een Notarus ende een sulck ghetuyghe by sijn, op dat daer nae niet erghens in eenich misverstant ontstae: ende soomen den Notarius niet vinden en conde, dat die selve niet byder hant ofte over lant ghereyst waer, soo salmen onder desen pant nemen.

Als yemant een ware wert vertrout, soo sal de ghene die sulcks vertrouwt is, wel toesien of de crediteur Godt vreest, ende en sal het minste bedroch hier in niet verschoonen ende niemandt en sal hem oock weygheren hier over ghetuygnis te gheven, want het is een groote sonde, ende Godt die alle Hemelsche ende aertsche dinghen gemaeckt heeft, die siet alle verborghen saken, ende weghet op ghelijcker schale, so wel het gene dat jemant in sijn herte behout, als het ghene dat hy metten monde seyt, want het goede beloont hy ende het boose straft hy alles na sijnen wille.

Niemant en sal een getuyghe of Notarius beschuldighen, want Godt wert daer deur op’t hoochste vertoornt.

De Prophete heeft den boeck die hem vanden Hemel hier neder is gesonden geworden, ghelooft, ende also sullen oock alle vrome lieden aen Godt ghelooven, Sy sullen oock sijn Engelen, sijn boecken, ende sijn Propheten aen nemen ende toestaen, ende niemant en sal hem onderstaen tegen de Propheten te disputeren. O Godt wy moeten weder tot u comen, want wy hebben tot uwe geboden schuldighe gehoorsaemheyt bewesen, wy verwachten ende bidden u om vergiffenis, en rekent ons onse verghetentheyt ende dwalinghe niet toe, noch en stort uwen toorn niet over ons uyt, van weghen de misdaet onser voor-ouders: en legt ons niet op eenen last die onverdraeglijck zy, want u eygenschap is, dat ghy niet boven ons vermoghen van ons eysschen sult: O Godt ghy sult ons vergheven, ghy sijt onse Heere, behoet ons voor de boose menschen, ende staet ons by tegen de oproerighe lieden.