Apollo of Ghesangh der Musen
(1615)–Anoniem Apollo of Ghesangh der Musen–
AuteursrechtvrijStem. Schoon lief wilt my troost gheven.SInt dat ghy mijn ghedachten
Seer vriendelijck verkrachten,
Soo loos ick sucht op sucht,
Een onghevvoone smerte
Bekommert staegh mijn herte,
Tervvijl ick hoop en ducht.
Ick hoop u Hemels vvesen
De vvonden sal ghenesen
Die 't selve heeft ghemaeckt,
Door u beleefde seden
En minnelijcke reden
Daer ghy mee zijt bespraeckt.
Ick ducht ter ander sijden
Dat mijn ellendich lijden
V niet bevveghen sal,
Daerom soeck ick te decken
'T geen dat ick doe vervvecken
In allerley gheval
'T is buyten mijn vermoghen
VVant mijn verliefde ooghen
Sien altijdt na u deur,
Daer leyt mijn ziel begraven
Dits mijn behouden haven,
Hier leyt mijn ancker veur.
Seght eens , en seght Goddinne
Of by gheval u minne
Op yemandt vvaer gheleyt,
VVoudt ghy niet insghelijcken
Dat hy u liefd deed blijcken
Tot vvare danckbaerheyt?
Indien ghy't soudt begeeren,
Laet u mijn suchten deeren,
En draecht mijn vvederliefd',
Soo vverdt min heyl ghekreten,
En ick soud salich heten,
Om dat ghy my verhieft.
|
|