Apollo of Ghesangh der Musen

[p. 43]

Au moins, si possi dire.

WAt baet dat u Coralen
Met Paerlen zijn gheciert,
En dat als gulden stralen
V hayr zijn glans versiert,
Dewijl u schoon ghesicht,
In niemants oogh en light.

Weet ghy niet dat d Goden

Een yder sijnen tijt
Wel te ghebruycken noden,
Dies ghy ghesonden zijt
V schoone jonghe jeucht.
T' ghebruycken nu ghy meucht.

Want schoonheyt slacht de Sonne

Die 'smorghens vroegh op staet,
En 'smiddaghs komt gheronnen
Tot in sijn hooghsten graet,
Des avondts daelt hy neer
Tot onder d'aerde weer.

Meent ghy niet dat de vrouwen

Door al te grooten keur
Dick 't snootst voor 't beste houwen,
Soo't valt wel dick te beur
Die door te hooghen pracht
Met yder spot en lacht.

Die al te hoogh wil vlieghen

Sijn vleughels wel verbrandt:
Goetdunckenheyts bedrieghen
Brenght menich mensch in schandt,
Goddin siet toe, siet toe
Neemt mijn vermaen in't goe.