Apollo of Ghesangh der Musen



[pagina 18]
[Dat Venus Ionghen, dus is gheschent]
Voys: O Roosken root. DAt Venus Ionghen, dus is gheschent Met duysent tonghen, maeck ick bekent, Dewijl den dief, sliep nam mijn lief, Sijn boogh En al sijn pijlen die sy met haer droegh. Sy nam de banden, tot sijnder schandt, Die sy noch an den, pijl-koker vandt, En bondt bequaem, sijn handen t’saem Aleer Dat hy ontwaken cost en bieden weer. Als hy te spade, hem sagh verheert, Heeft hy ghenade, aen haer begeert, Hy boogh sijn knien, maer sy ginck vlien En liet Den lecker blijven in dat groot verdriet. Dies sy terwijlen, besat sijn macht, Sy kent sijn pijlen, ghebruyckt haer kracht, Ten is by loo, gheen Cupido Die doet Dat ick op haer altaer dus stoocken moet. Wech, wech, ghy blinde, verlooren soon, Want mijn beminde, stelt my gheboon, Sy stiert mijn sin, als mijn Goddin Altijt Dewijl ghy maer een o in’t Chijpher zijt. Vliecht winden snellijck, en blaest haer lof In’t oor van ellijck, nu hebt ghy stof, Maeckt datter gheen, meer zijn ghebeen, En stroyt Door desen naeckten benghel gantsch beroyt. Vrede baert rust.