Het Antwerps liedboek. Deel 1. Teksteditie

[p. 470]

210 Een nyeu liedeken

[Commentaar]

1
Bourgoensche herten, wilt u verblijden
En scaffet eenen huebschen moet!
Elck help den Keyser vromelijc strijen
Met alle zijn edelen goet,
Want hi is comen na dat Gentse pleyn
En voort al na Antwerpen certeyn,
Comt hi die borgers vercloecken,
Borgoense herten in allen hoecken.

2
Hy heeft voor Landerci gheleghen
Met menighen vromen man.
Al en heeft hijt doen niet gecreghen,
Daer en leit nu niet veel an:
Landurcy sal noch tzijnen besten zijn.
Elck Borgoensman, op dit termijn,
Wilt vrolijck jubeleren,
Met onsen Keyser wilt triumpheren!

3
Die Fransoysen hebben daer gelaten
Bussen, poeyer ende clooten goet.
Landerci hebben si verlaten
Met alle dat Franse bloet.
Die Fransoysen zijn comen al met gewelt,
Den Keyser heeft hem in een slachoorden gestelt
En heeft die Fransoysen verdreven;
Vele hebbender gelaten haer leven.

4
Die Fransen meynden int gemeyne,
Dat onsen edelen Keyser was doot.
Die Torck, Fransoysen, groot en cleyne,
Wordent geware - verstaget den cloot! -
Want hise beschiet met pulver en bly,
Den Fransman moest wijken - verstaget wel mi! -
Met alle zijn ondersaten.
Torcken en Fransoysen most hi daer laten.

[p. 471]

 

5

 

Den Dolfijn heeft daer gelaten

 

Silver en daertoe roode gout.

 

Merten van Rossum quam te baten

 

Den edelen Keyser seer stout.

 

Den grave van Bueren, stout, edel en coen,

 

Die hielp daer menigen Fransen man ontdoen,

 

Menigen Turck van onwerden,

 

Te voet ende ooc te perden.

 

 

 

6

 

Die Fransoysen hadden haer vermeten

 

In alle so corten stont,

 

Qualijck hebben si haer gequeten:

 

Si liepen van daer, goet ront,

 

Daer den Fransen coninc af heeft bescheit!

 

Hi heeft ons gedaen so menich leyt,

 

Al met die valsche Turcken,

 

Wi en achten zijn pochen noch snorcken!

 

 

 

7

 

Den coninc had hem vermeten

 

Met alle zijnen staet:

 

Hi meynde ons hebben verbeten,

 

Maer hi is comen te laet!

 

Dies hi keeren moet binnen cort termijn

 

En eeren onsen Keyser fijn,

 

Also daer is beschreven,

 

Door Godlijcke propheten verheven.

 

 

 

8

 

Loef God al van hier boven,

 

Gheeft Hem prijs, eer en daertoe danc!

 

Laet ons den Keyser loven

 

Al nae der propheten sanck,

 

Die gescreven hebben over menighen tijt,

 

Dat onsen Keyser sonder verwijt

 

Soude triumpheren over zijn vyanden,

 

Turcken, Franchoysen brengen ter schanden.