Het Antwerps liedboek. Deel 1. Teksteditie

[p. 408]

melodie depb 1539, nr. 124

[p. 409]

184 Een nyeu liedeken van die coninghinne van Enghelant

[Commentaar]

1
Een liet met droevicheden
Sal ick u doen ghewach:
Hoe ter werelt is overleden
- Wilt horen dit beclach! -
Die coninghinne ghepresen
Van Enghelant voorwaer.
God wil haer ghedachtich wesen,
Die ons heeft al ghenesen
Ter werelt van sonden swaer.

2
Hoe mocht een stenen herte gedoghen
Dat den coninc daer dede aenschijn?
Thien mijlen uut sinen ooghen
Moeste si altoos van hem sijn.
Ende den coninck ghinck boeleren
Met een ander - dit wel onthout! -
Al door sijn lant passeren
Ende daerboven - wilt dit gronderen! -
Heeft hijse teenen wijve ghetrout.

3
Dit heeft si ter herten ghenomen,
Dat haer den coninc hadde ghedaen.
Si is in een bisschops hof ghecomen
Ende was met siecten bevaen.
Daer heeftse troost vercreghen
Ende wert daer eerlijck onthaelt.
Den rouwe is haer ter herten ghesleghen,
Si is te bedde gheleghen
Ende hevet metter doot betaelt...

[p. 410]

 

4

 

Het deerlijck overlijden

 

Sal ick u doen ghewach.

 

Men hoorde noyt tenighen tijden

 

So deerlijcken beclach.

 

Den bisschop van Coleten

 

Die wasser altoos ontrent;

 

Veel worden int secreten

 

Heeft si hem laten weten

 

Doen hi haer gaf dat heylighe Sacrament.

 

 

 

5

 

‘Och, adieu, wilt u eerlijck draghen,

 

Mijn man, mijn heere reyn.

 

Ghi sult mi noch beclaghen,

 

Dat ducht ick van u, certeyn.

 

God die willet u vergheven

 

Dat ghi mi hebt ghedaen:

 

Uut uwen ooghen verdreven!

 

Dat sal mi coosten tleven.

 

O, ghi waert seer qualijck beraen...

 

 

 

6

 

Adieu Carolus, mijn neve gepresen,

 

Adieu mijn vrienden overal,

 

God wil u ghedachtich wesen

 

Ende behoeden u voor misval.

 

Dese werelt moet ic laten,

 

In eenen soberen staet...

 

Opdat ic niet en worde verwaten,

 

O Jhesus, coemt mi te baten,

 

Voor God den Vader mijn advocaet.

 

 

[p. 411]

 

7

 

Adieu mijn neve, Rooms Coninc ghecoren,

 

Dom Fernandus excellent.

 

Adieu vrou Marie, edel gheboren,

 

Van Vlaenderen ende Brabant regent.

 

Adieu coninghinne van Vrancrijcke,

 

Doen ghi quaemt met state groot

 

Al binnen Camerijcke,

 

Ick willich daer oock ghelijcke

 

En claghen u mijnen noot.’

 

 

 

8

 

Dit heeft de coninghinne van Engelant ghesproken

 

Int dootbed daer si lach;

 

Met dien heeft sy haer ooghen geloken.

 

In januario den achsten dach

 

Is si van der werelt ghescheeden,

 

Die coninghinne van Enghelant.

 

God wil die siele gheleeden

 

En haer Zijn Rijcke bereeden

 

In die eewighe glorie playsant.