Het Antwerps liedboek. Deel 1. Teksteditie

[p. 399]

177 Een nyeu liedeken

[Commentaar]

1
Bourgoenschen, laet ons vrolick singhen
Ende maken eenen goeden moet!
Al willen ons die Kleefsche dwinghen
En nemen ons lijf en daertoe goet,
Wi hebben victalie ende goet gheschut te vueren,
Ghelt ende daertoe den coelen wijn.
Antwerpen, en wilter niet trueren,
Maer laet ons altijt vrolijc sijn!

2
Ons borch is met rooskens becranst,
Te wetene wit ende root,
Daer menich vorst ende knecht om danst;
Wi en hebben van haer gheen noot!
Wi willense tsamen verschueren
Met haren verraders fenijn!
Borgoenschen, en wilter niet trueren
Maer laet ons altijt vrolijc sijn!

3
Wi hebben op haer ghebrouwen
Ons spijse die is wel gaer:
Met spiesen ende cortouwen,
TAntwerpen int openbaer.
TAntwerpen op die mueren,
Daer zijn die burghers fijn:
Edel Antwerpen, en wilter niet trueren
Maer laet ons altijt vrolijc sijn!

4
Onsen dranck die sal verschalen,
En comen die Ghelderse niet aen boort:
Haer roemen sal hen falen
Elck segghet:
‘Schamt u der valscher kueren,
Ghi Kleefsche aen ghenen Rijn!’
Borgoenschen, en wilter niet trueren
Maer laet ons altijt vrolijc sijn!

5
Haer ruyters sullen ons verblyden,
Hen paerden comen ons goet,
Dan sullen wi vroom broeders rijden
Die nu gaen een deel te voet!
Ons ghevanghen in corter hueren
Sullen si wesen, al doeghet haer pijn!
Antwerpen, en wilter niet trueren
Maer laet ons altijt vrolijc sijn!

6
Goet Keysers sullen si leeren,
Die Fransoysen nu overal,
Seer cleyn tot haerder eeren.
Tis haer een groot misval
Dat si haer oyt ghinghen rueren
Teghen den Keyser, ons alder medecijn.
Borgoenschen, en wilter niet trueren
Maer laet ons altijt vrolijc sijn!

7
Marten van Rossum, u mach wel verdrieten
Dat ghi Antwerpen oyt quaemt so by
En dat ghijt noyt en dorste beschieten,
Terechte mach men u wel segghen: ‘Fy!’
Maer ghi dacht ons te besueren
Met u verraders wel als cokijn.
Antwerpen, en wilter niet trueren
Maer laet ons altijt vrolijc sijn!

8
Hiermede beveel ick u den Heere,
Ghi Borgoenschen met herten fier,
Ende doeghet na mijn leere
Ende drinct den wijn ende bier.
Maer altijt wil bespueren
Die verraders op elck termijn.
Borgoenschen, en wilt niet trueren
Maer laet ons altijt vrolijck sijn!