Het Antwerps liedboek. Deel 1. Teksteditie

[p. 330]

melodie Souterliedekens 1540b, ps. 75

[p. 331]

147 Een oudt liedeken

[Commentaar]

1
Trueren moet ick nacht ende dach
Ende lijden also groot verlanghen,
Om een die liefste die ick oeyt sach.
Si heeft mijn herteken bevanghen,
Doorschoten heeft zijt also menichfout.
Si heeft mijn herte in haer ghewout,
Na haer staet mijn verlanghen.

2
In wat plaetsen dat ick bin,
Si staet in mijn gedachte.
Daer en mach gheen liever liefken comen in,
Bi daghe noch oock bi nachte;
Dat heeft haer claer aenschijn ghedaen.
Woude si mi in haer herteken ontfaen,
So waer alle mijn lijden sachte.

3
In alle dese werelt wijt
En weet ic geen so lief
Als ic aensie haer claer aenschijn,
Daeraf neme ic alle mijn gherief.
Mer lacen, als ick van haer moet zijn,
So is alle mijn blijschap pijn.
Ick en doe niet dan suchten ende beven.

4
Helpt rijck God, hoe wee is mi
Als ic van haer moet scheyden!
Och, mochten wi wesen van clappaerts vrij,
So waer mijn herte ghenesen.
Si brenghen die menighe in swaer verdriet.
Schout quade tonghen, waer gise siet,
Si zijn so valsch ghepresen!

5
Clappaerts moeten clappaerts zijn,
Ic wilse gaen laten varen
Ende schencken die alderliefste mijn
Thienduysent goeder jaren.
Si is die liefste op al aertrijck,
Ic wilse gaen dienen ghetrouwelijck.
God wil mijn liefken bewaren.

6
Help rijck God Heere, hoe wee is mi,
Als ic van haer moet scheyden!
Trueren, ghi blijft mi altoos bi,
God wil mijn liefken gheleyden.
Al is mijn avontuere dus cranck,
Ic hope het sal beteren eer yet lanck
Den tijt moet ic verbeiden.