Het Antwerps liedboek. Deel 1. Teksteditie

[p. 312]

melodie Souterliedekens 1540b, ps. 35

[p. 313]

137 Een amoreus liedeken

[Commentaar]

1
Rozijn, hoe is dijn ghestelt!
Bi coninck Paris' tijden,
Doen hi den appel hadde in zijn ghewelt,
Die alderliefste woude hijt gheven.
Voorwaer, ghelooft:
Hadde Paris u schoonheyt aenghesien
Venus en waer niet begaeft daermede;
Den prijs waer u ghegeven.

2
Ick weet, hadde Virgilius u ghekent
Eer hi bedachte te scriven
Van die schoone Helena yent
Al uut der Griecken lande,
Een croon boven alle wijven:
Ghi hebt die schoonheyt veel meer dan si
Haer scoonheyt toegemeten.
Daerom so is mijn herte so vast met haer liefde beseten.

3
Ick weet, had Pontus bi zijnder tijt
Ghesien een dierghelijcken,
Sydona die hadde breedt ende wijdt
Met haer schoonheyt moeten wijcken,
Ende ander veel meer. Daer ick deer,
Lief, hebben u in trouwen, saert joncfrou fijn,
U dienaer so wil ic zijn,
So langhe als ic leve opter aerden.