Het Antwerps liedboek. Deel 1. Teksteditie

[p. 100]

melodie Fruytiers 1565, nr. 54

[p. 101]

44 Een nieu liedeken

[Commentaar]

1
Een aerdich vrouken hevet mi bedroghen
Daer ick was op verghect.
Haer smeekende woorden zijn al ghelogen,
Dat vinde ick nu perfect!
Si is mi te doortrect,
Te dubbel ooc van gronde,
Dus keer ick mi van haer.
Si payter so vele met haren valschen monde,
Ic en achtse niet een haer.

2
Ghesellekens, wilt u sinnekens keeren
Van sulc een schoon samblant,
Want si soude u plucken ende minnen leren.
Ja, hebdijt wel in die hant?
Daeraf heb ict verstant.
Gaet Vlaender gheheel int ronde:
Gheen wijf so wanckelbaer.
Si paeyter so vele met haren valschen monde,
Ic en achtse niet een haer.

3
Nu laet ic een ander zijn goet verquisten,
Van sinnen jonck ende mal,
Want met hare subtijle listen
Si u wel plucken sal
Ende vallen eenen val.
Dat is daghelicx bevonden
Met u, hier ende daer.
Si paeiter so vele met haren valschen monde,
Ic en achtse niet een haer.

4
Wat heb ic met u al tijts versleten,
Ic en spaerde gelt noch goet.
Nu ben ic van den back ghebeten,
Ic en weet niet wiet mi doet,
Des ic mi bedwingen moet
Int aenhoren van haer faconde,
Dat segghe ic u voorwaer.
Si paeiter so vele met haren valschen monde,
Ic en achtse niet een haer.

5
Joncfrou, ghi laet nu voor u knielen,
Ghi zijt daervoor bekent.
In een osbaer met drie wielen
Suldy nemen u endt!
Ick triumphere gent
Als ghi tot allen stonden
Sult sitten int liden swaer.
Si paeiter so vele met haren valschen monde,
Ic en achtse niet een haer.

6
Adieu! Ghi waert eens mijn princesse
Met uwen soeten rel.
Adieu, ghi paeyter vive oft sesse,
Toeft Hanneken ende Wuyten wel!
Adieu mijn dubbel vel!
Doen ic met haer triumpheerde,
En vraechde ic niewers na.
Si payter so vele met haren valschen monde,
Ic en achtse niet een haer.