Het Antwerps liedboek. Deel 1. Teksteditie

[p. 98]

42 Een oudt liedeken

[Commentaar]

1
Een jonck herteken, goet van prijse,
Ghinck voor een joncfrouwe staen.
Hi seyde: ‘Joncfrouwe, met goeden avijse
Mochte ic in uwen boomgaert gaen,
Ick soude van den bladerkens plucken
Ende die rooskens laten staen.’
Si seyde: ‘Jonckheere, dat is wel verstaen,
Mer ten sal also niet zijn:
Daer en is maer een alleyn
Die van mijnen boomken reyn
Plucken sal een bladekijn.’

2
Hi seyde: ‘Wel overschoone joncfrouwe,
Laet mi in uwen boomgaert gaen
Ende ic sal van die rooskens plucken
Ende die bladerkens laten staen.’
Si seyde: ‘Jonckhere, dat waer wel gedaen
Mer ten mach also niet zijn:
Want daer en is mer een alleyn
Die van mijnen boomken reyn
Plucken sal een bladekijn’

3
Hi seyde: ‘Wel overschoone joncfrouwe,
En verantwoordet niet so fel,
Ick hebbe veel berghen sien hoogher dalen
Dan dat torreken datter nederdaelt.’
Si seyde: ‘Jonckheere, ick ghelooves wel,
Mer ten sal also niet zijn:
Daer en is mer een alleyn
Die van mijnen boomken reyn
Plucken sal een bladekijn.’

4
Hi seyde: ‘Wel overschoone joncfrouwe,
Ick legghe mijn hooft in uwen schoot;
Moechdy mi nu gheen troost gheven
So blijve ic van trouwe doot.’
Si seyde: ‘Joncheere, ghi en hebt gheen noot.
Ghi verliest uwen tijt:
Daer en is mer een alleyn
Die van mijnen boomken reyn
Plucken sal een bladekijn.’