Antwerps liedboek

220 Een nyeu liedeken

1
WOnder sietmen nv ghebueren
Van onsen Keyser playsant
Men siet hem al omme verschueren
Sijn vyanden in zijn lant
Hi is comen verstaet wel dat
Sijn vyanden die en wisten niet bat
den cabbeliau had hem verbeten
maer hi en heeft ons niet vergeten

2
Binnen diest heeft hi gheleghen
met so menighen vromen man
Na dat hi gelderlant in heeft gecreghen
dat lant van gulic ende cleue als dan
die hem nv al onderdanich zijn |
En niet meer en willen wederspanich zijn
mer helpen hem strauen als donbekende.
de torc fransoysen met haerder benden

3
Den prince van araengien als opperveltheere
der Keyserliker maiesteyt
Verwaert gelderlant met prijs ende eere
Al om zijn vromicheyt
Is een beschermer van dat geldersce lant
onder die bourgoensce is hi seer wel bekant
dat weten al zijn vyanden
Want si zijn nv onder des keysers handen

4
Vier en twintich venlijn geldersce knechten
Sijn corts door liere gepasseert
En willen den keyser gaen helpen vechten.
Xij. hondert peerden onghecesseert
die gaen nv onsen keyser bijstaen
Om den franchoys doen ruymen die baen
met al zijn medeplegers
En verstoren die franche en torcxe legers

5
O Coninck v mach wel gruwen

[fol. 128r]

 

Vander grooter ouerdaet

 

Dat ghi met den torck hebt gebrouwen

 

Het sal v noch worden quaet

 

Want v gantsce gheheele macht

 

Sal ten eynde wesen heel tonderbracht

 

Want den Enghelsman cloeck van leden

 

En sal v ooc niet laten met vreden

 

 

 

6

 

Al hebdy den torck te baten

 

God heeft bouen al die macht

 

Ghi sult hem noch moeten verlaten

 

En ontsien des Keysers cracht

 

Want hi comt met groten ghewelt

 

Den hertooch van Cleue heeft hem biden keyscere gestelt

 

Met al zijn ondersaten

 

Comt hi den keyser oock te baten

 

 

 

7

 

Van diest is ons keyser ghetoghen

 

In dat Henegoussche lant

 

Daer die fransoysen ongheloghen

 

menich schoon dorp hebben verbrant

 

maer die van bins hebben den fransman weer|staen

 

Si hebben den dolfijn doen rumen de baen

 

Met alle zijn ondersaten

 

Sijn opperste capiteyn moest hi daer laten.

 

 

 

8

 

Dus moeten si alle varen

 

Die teghen den keyser opstaen.

 

En die hen seluen paren

 

Om ons te doen ruymen die baen

 

Laet ons god bidden groot ende cleyn

 

Voor al de bourgoensce kinderen reyn

 

Voor onsen keyser ghepresen

 

Dat hi victorieux mach wesen