Antwerps liedboek
(2001)–Anoniem Antwerps liedboek–
Auteursrechtelijk beschermd
[Folio 117v]
| |
1
O God van hemelrijcke
Wat druc is ons gheschiet
die Borgoensche alle gelijcke
God behoede Borbon voort verdriet
Twas so vromen capeteyn
dien hebben wi verloren
Den eedelen heere reyn
2
Menich slach heb ick ghesleghen
Te peerde en oock te voet
Groote victorie heb ick ghecreghen
Ter eeren den keyser soet
Menich leet heb ick den coninc gedaen
daer hi quam al voor pauien
daer en mocht hi mi niet ontgaen
3
Melanen hebbe ick in ghenomen
met menighen crijsch man vry
die Paus hadde dat vernomen
die sandt hem groot volck by
Si meenden mi wel af te slaen.
die Veneetsianen quamen mede
Mer ten was haer niet wel vergaen |
4
Heel ytalien heb ick bedwonghen
Ter eeren den keyser fier
Roomen heb ick bespronghen
daer ben ick ghecomen int dangier
Het ghebuerde al inden tweesten slach
daer ben ick oo deerlijcken doorschooten
daert so menich man ansach
5
Och adieu Kaerle lieue neue
Het moet nv ghescheyden zijn
Nv moet ick v begheuen
Want het scheyden doet mi pijn
Ic waende met v te vinnen dat keylich lant
Nv moet ic ommer steruen
God blijue nv dijn onderstant
6
Adieu ghi edel heeren bouwe
Adieu graef Ioris van sassen goet
Weest toch den Keyser ghetrouwe
dat bidde ick vry edel bloet
adieu vice roy de napels vry
Nv moet ick van v scheyden
| |
[Folio 118r]
| |
Gods barmherticheyt staet mi by
7
Die heeren weenden seere
si hadden groot verdriet
Al om borbon den heere
dat hi so droeflijck schiet
die knechten maecten groot misbaer
Si en wisten wat bedrijuen
deen vranck sijn handen dander trac
zijn hayr
8
Ons troost hebben wi verloren
Ende oock ons toeuerlaet
Ick bidde Ihesum wtuercoren
dat hi zijn siele ontfaet
Ghetrouwen dienst heeft hi ghedaen
God sal een ander verwecken
die den keyser nv sal bi staen
9
Wi moghen wel bedrijuen rouwe
Om Borbon den capeteyn goet
Ende voor Wassenaer ghetrouwe
Hi heeft oock ghestort zijn bloet
Ter eeren den Keyser dat is waer |
Men mocht gheen getrouwer vinden
dan dese twee int openbaer
|
|