Antwerps liedboek

201 Vanden Landtman

1
LAet ons den landtman louen
Met sanghe ende vruecht
Want hi gaet al te bouen
Om sijn loyale duecht
Landouwen sloten steden
Daghelijcx spijst ende voet
Met sijn sweetighe leden
Den edelen landtman doet
Daert al by leuen moet

2
Hertoghen Princen Grauen
Sullen si zijn ghespijst
den landtman moet beslauen
Thes recht datmen hem prijst
Als heeren triumpheren
En schaffen huypschen moet
Men siet hem laboreren
den edelen Landtman goet
Daert al. etc

[fol. 115v]

 

3

 

Elck doet den landtman toren

 

Waer hi sayt ende plant

 

die mollen blint gheboren

 

wroeten naert hem mest meshant

 

die coeyen schapen en swijnen

 

die comen metter spoet

 

En doen zijn vrucht verdwijnen

 

den edelen landtman goet

 

Daert. etc

 

 

 

4

 

Vrou venus lacke dieren

 

Die doen hem groot gequel

 

Sijn vruchten niet en vieren

 

Als si ligghen in haer spel

 

Si stommelen ende si steken

 

Al varen si verhoet

 

Sijn coorne deerlijc breken

 

den edelen landtman goet

 

Daert. etc.

 

 

 

5

 

Elck besicht daer zijn clauwen

 

Hoenders en voghels vry

 

Men gaeter ter oeste houwen

 

Hi en isser niet altijs by

 

Men soude qualick ghelouen |

 

Hoe menich ontschamel bloet

 

Trecken en teesen wt zijn schouen

 

den edelen landtman goet

 

Daert. etc

 

 

 

6

 

Dan is hi van die papen

 

Om zijn thiende ghequelt

 

die costers staen en gapen

 

Om eyeren schoouen oft gelt

 

Susters ende baghijnen

 

Om hebben elc hen groet

 

dus laet hi vanden sijnen

 

den edelen landtman goet

 

Daert. etc.

 

 

 

7

 

Mulstooters met haer rijuen

 

Om kiekens koorne en vlas

 

Connen wonder bedrijuen

 

Die vier oordenen op dat pas

 

Willen hem gods rijcke verleenen

 

Met huer bedinghe soet

 

Mer tes hebben dat si meenen

 

vanden landtman goet

 

Daert. etc.

 

 

 

8

 

Die iaghers en serganten

 

die zijn oock geerne verblijt

[fol. 116r]

 

Want si hem voor terwanten

 

En boeuen hebben beurijt

 

Den molenaer vanden mele

 

Als hi ter molen doet

 

Schept diepe god weet hoe veele

 

Vanden edelen landtman goet

 

Daert. etc

 

 

 

9

 

Vossen fissauwen fluwijnen

 

doen zijn hoenders en ganssen stoot

 

die woluen wreet om schouwen

 

bijten coeyen en schapen doot

 

Wesels suypen so si pleghen

 

Sijn eyrren onghebroet

 

dus commet hem alle tseghen

 

den edelen landtman goet

 

Daert. etc.

 

 

 

10

 

Christus die tonser vrame

 

Ter eeren den landtman fijn

 

Sijn bloet ende lichame

 

Schanc onder broot ende wijn

 

En als hi was verresen

 

Quam als een landtman vroet |

 

Moet in zijn hulpe wesen

 

Den edelen lantman goet

 

Daert al bi leuen moet.