Antwerps liedboek

198 Een nyeu liedeken

1
IC wil gaen om mijn ghewin
En soecken hansken ende gille
Ick heb eenen man naer mijnen sin
Hi laet mi doen al dat ick wille
Als ict al besorghe op dit termijn
Dan segt hi. Een vrou van eeren suldi zijn

2
Ic loope rincketten aen elcken cant
En ic doe mijn keelken clincken
Ic gheue mijnen man eenen penninc in de hant.
daer me so gaet hi sitten drincken
Als ic ghelt thuys brenge cust hi mijn
dan segt hi. Een vrou.

3
Ick sitte heel nachten op die banck
Niet achter op der lieden snaer

[fol. 113v]

 

Ick hebbe eenen man naer mijnen danck

 

Hi draecht mi gans duer vier en water

 

Als ic hem hou gaeude te bier te wijn

 

dan segt hi. Een vrou.

 

 

 

4

 

Al werdick beclapt men vinter meer

 

daer af en maect mijn man gheen voere

 

Hi kijft so ruytelic voor mijn eer

 

En segt mijn wijf en is geen hoere

 

Ick beloue hem een paer cousen fijn

 

dan segt hi Een vrou.

 

 

 

5

 

Hi laet mi nv mijn willeken doen

 

So langhe als icket al betale

 

Coop ic nyeu cousen oft trijpen scoen

 

Hi en vraghet mi niet waer dat ict hale

 

Al doe ick al dit ten is hem gheen pijn

 

dan segt hi. Een vrou.

 

 

 

6

 

Al werdic ghebesicht wat lichter aen

 

Het en scaedt mi niet een boone

 

Ick come weder thuys tot mijnen man

 

En ick gheue hem een gouden croone |

 

Als ic hebbe ghehadt een goet ravijn

 

Dan segt hi. Een vrou van eeren suldi zijn

 

 

 

7

 

Oorlof men vinter noch meer bekent

 

Van sulcken aerde in allen hoecken

 

In vlaendren brabant te brugh te gent

 

die wel tconto orboren laten versoecken

 

En haer mans wel payen met cluchten fijn

 

En willen nochtans vrouwen van eeren sijn