Antwerps liedboek

183 Een nyeu liedeken

1
EEn meysken leyde een knechtken te voren
Te trouwen naer den Bruycxsen aert
En hi en wilder niet naer hooren
Maer hi deynde al achter waert
Ey ey hi en derf niet comen
Ey ey hi is veruaert

2
Ten eynden soo was hi te vreeden |
Hi souse trouwen onghespaert
En doen beefden hem alle zijn leeden
Hoe hebbe ic mi aldus beswaert
Ia ia hi en derf niet comen
ia ia hi is veruaert

3
Alsmen die bruyloft sou gaen houwen
Ende die vrienden waren vergaert
Het meysken sprac ghi moet mi trouwen
En doen craude hi sinen baert
Ey ey hi en derf niet comen
Ey ey hi is veruaert

4
Die bruyt die is te bedde ghegaen
En sy sprack lief compt heruaert
Doen ghinck hi in een hoeck staen
En hennen toochde sijnen aert
Ia ia hi en derf niet comen
Ia ia hi is veruaert

5
Hennen soude te bedde waert gaen
Hi sey vroubruyt licgt achter waert
Doen worden zijn oochskens allen traen

[fol. 104r]

 

Sijn herteken was so seer beswaert

 

Ey ey hi en derf niet comen

 

Ey ey hi is veruaert

 

 

 

6

 

Hi en wist niet hoet ontlegghen.

 

Om dat hi sou sijn ghespaert

 

Ick bidde v willet die kinderen segghen

 

Dat sijer me gaen ommostaert

 

Ia ia hi en derf niet comen

 

Ia ia hi is veruaert