Antwerps liedboek

182 Een nyeu liedeken

1
DIe wachters hoorde ick rijden
Ghi lantsknechten maect v inde weer
Meynaert met sinen lammen leden
Die comt ons voor heynsberch heyr
Hy brengt met hem so menich man
Ghy crijslieden wiltse aenschouwen an
Ende wilt verdienen tprijsen
Na doude lansknechts wijsen

2
So haest als wy vernamen
Ende hoorden des wachters woort
Wy lantsknechten alle te samen
Maecten ons al op die poort
Men sach daer geen crijsknecht trueren
het dochte ons meest gelderse boeren
Wy boden haer goeden morghen
Ende schoten daer in sonder sorghen

3
Eenen brief is ons ghecomen

[fol. 103r]

 

Met een bode al op dat pas

 

Daer in dat wy vernomen

 

Dat Meynaert haer ouerste was

 

O hertoch Willem hooch gheboren man

 

Is uwen raet an Meynaert van ham

 

Merten van Rossem en sulcke reden

 

Si bringhen v om landen en steden

 

 

 

4

 

Bode keert weder om tzo velden

 

Dat gheuen wy v voor den besten raet

 

Segt meynaert dat hi laet zijn schelden

 

En sien wat in sinen boesem gescreuen staet

 

Hi begheert van ons dese stercke stadt

 

Schaemt hy hem niet wi weten wel badt

 

Wilt hy ons crijghen leeren

 

Den Keyser hebben wy tot een heere

 

 

 

5

 

Hi begheert een antwoordt schriftelick

 

Dat dunct ons wesen so vreemden spel

 

Met spicen cortouwen ende der ghelijck

 

Hebben wy leeren schrijuen wel

 

Daer hebben wy mennighen lants|knecht by

 

Sy schrijuen so dapper met puluer en bly

 

Wilt hy die brieuen lesen

 

Van die pocken sullen wy hem ghenesen.

 

 

 

6

 

Op eenen morghen si ons beleyden

 

Op eenen saterdach dat dat gheschach

 

Mer des maendachs moesten sy wederom scheyden

 

XIX. Vendelijn men vlieghen sach

 

Si hoorden daer quam so grooten gewelt

 

Meynaert van ham moeste rumen tvelt

 

dat deden die borgoensche heeren

 

Het narren spel wilden sy hen leeren

 

 

 

7

 

Thof van borgoenien willen wi louen

 

dat ons heeft ontset met spijse ende dranck

 

nv sitten wy by den cacgel ouen

 

Nirredom noeye is onsen sanc

 

Op Meynaerts garde worden ons dye billen bloot

 

Die Keyser loont ons met penningen root

[fol. 103v]

 

Wy maken ons cleeder doorsneden

 

Naer donde lantsknechts seden

 

 

 

8

 

Die dit liedeken dichten

 

Dat was een lantsknechts goet

 

Sijn herte dat sachmen verlichten

 

Hi isser wel toe ghemoet

 

Om Heynsberch te houden ende drincken den wijn

 

Aen Meynaerts garde en wil hy niet meer sijn

 

Hi laet hem sijn bullen vercoopen

 

Hi wil blijuen bi skeysers hoopen