Antwerps liedboek

[fol. 97r]

174 Een nyeu liedeken.

1
AL ben ic van den scamel ghesellen
Y nochtans so willic vrolic zijn
Van thienen van vieren so wil ict stellen
En drincken den hupsen coelen wijn
Hi laet ons drincken en clincken
En laet ons maken den dobbelen haen
Mijn keelken moet wijnken drincken
Al sou mijn voetken baeruoets gaen

2
Wel eten wel drincken dat doet mi specken
Verstaghet al mijnen sin
Een potteken drincken een potken lecken
daer staet al mijn leuen in
Hi laet ons drincken en clincken
En laet ons maken den dobbelen haen
Min keelken moet wijnken drincken
Al sou mijn voetken beruoets gaen

3
Met luilic wercken en vromelic broesen
Daer hanghet al mijn leuen aen
En wijnken drincken met dobbelen croesen |
Dit doen ic altijt waer ick can
Hi laet ons drincken en clincken
En laet ons maken den dobbelen haen
Mijn keelken moet wijnken drincken
Al sou mijn voetken baruoets gaen

4
Sinte noywerc heb ic vercoren
Tot mijnen alder besten patroon
Ic heb hem dapperlijc hulde ghesworen
In leechdom eer ic zijnen persoon
Hi laet ons drincken en clincken
En laet ons maken den dobbelen haen
Mijn keelken moet wijncken drincken
Al sou mijn voetken baruoets gaen

5
Sinte Luyaert heb ic om ghedraghen
En sinte noywerc heerlic gheuiert
Ic hebse ghedient bi nachte bi daghen
Sinte reynuyts heeft mi bestiert
Hi laet ons schincken en clincken
En laet ons maken den dobbelen haen
Mijn keelken moet wijnken drincken

[fol. 97v]

 

Al sou mijn voetken baruoets gaen

 

 

 

6

 

Dus ben ic vast te schepe gheseten

 

Int luysich schip van sinte reynuyts

 

En metter ghilde mijn daghen versleten

 

Dus geeft mi elcken toch wat cruyts

 

Hi laet ons scincken en clincken

 

En laet ons maken den dobbelen haen

 

Mijn keelken moet wijncken drincken

 

Al sou mijn voetken baruoets gaen

 

 

 

7

 

Oorlof Bacchus prince ghepresen

 

Ic vaer te platte borsse na mijn hol

 

Oorlof lieue Prince te desen

 

Ic drinc so gheerne mijn buycxken vol

 

Hi laet ons scincken en clincken

 

En laet ons maken den dobbelen haen

 

Mijn keelken moet wijnken drincken

 

Al sou mijn voetken beruoets gaen