Antwerps liedboek
(2001)–Anoniem Antwerps liedboek–
Auteursrechtelijk beschermd
[Folio 96v]
| |
Confortatie gheeft mi soete lief
Ic soudet so wel ghelijden
Mer eylacen schoon lieueken
Ten mach anders niet zijn
Ic wijts quade tongen
Veel erger dan fenijn.
Want zijt al beniden
waer datter vruecht gesciet
Troost ghi mi niet
so blijf ic int verdriet
2
O troost confoort
Na v staet alle mijn verlanghen
O wreede fortuyne
Hoe valdy mi dus fel.
Van die liefste die ic vercoos
En can ic gheenen troost verweruen
Mer eylacen schoon lieueken
Is dat niet groot gequel
Ic wijts quade tonghen. etc.
3
Onghetroost te sine
Waer vintmen meerder pijne
Want rooc ende smaec
Die doet al vergaen
Wel rieckende roosemarijne |
Gheeft mijn herteken een medecijne
Sal ick soete lieueken
Van v gheenen troost ontfaen.
Ic wijts quade tonghen. etc.
4
Oorlof schoon lieueken
Alst anders niet en mach wesen
Ick bedancke mi seere
Van uwer goeder duecht
Ic hope aen god den heere
Ic salt noch also wel ghelijden
Mer doet schoon lieueken
Van alle dat ghi moecht
Want ghi zijt die ghene
die mijn ionc herte verhuecht
Ende ghi weet schoon lieueken
Wat tusschen ons beyden is geschiet
Troost ghi mi niet so blijf ic int verdriet.
|
|