Antwerps liedboek
(2001)–Anoniem Antwerps liedboek–
Auteursrechtelijk beschermd
[Folio 91r]
| |
Van eender borchgrauinnen
Hoe si haer lief ghewan
2
Die heeren seyden wellecome timmerman
Ghi zijt ons waerste gast
Ghy sult noch tauont hangen
Aen eenen boom staet vast.
3
Waer om so sal ic hangen
Ic en ben ia gheen dief.
dat herte van minnen iongen liue
heeft een schoon vrou seer lief.
4
Sal ic noch tauont hangen.
Aen eenen boom staet vast.
versincken moeten die wortelen
Verbarnen moet den bast
5
Dat vernam een vrouwe.
Eens groten lantsheren wijf.
si dede haer paerdeken sadelen
Al om des timmermans lijf
6
Doen si haer paerdeken | ghesadelt had
Haer sporen had aenghedaen
So was den timmerman.
Ter leederen opghegaen
7
Nv hoort ghi heeren alle
Quaem die borchgrauinne voor v beddeken staen
Soudyse helsen ende cussen
Oft soudise laten gaen
8
Quaem mi die borchgrauinne
Voor mijn beddeken staen
Ic soudese helsen ende cussen
Ende vriendelijck ontfaen
9
Soudijse helsen ende cussen
Ende vriendelijck ontfaen
so en heeft dese timmerman.
Niet al te veel misdaen
10
Coemt af coemt af goet timmerman
V is verbeden v lijf |
dat heeft gedaen een vrouwe
Eens grooten lansheren wijf.
11
Heuet dat gedaen een vrouwe
Eens groot lantsheeren wijf
God houdse in haerder eeren
Ende mi mijn ionghe lijf
12
Hi wranck van sinen handen
Een gouden vingherlijn
dat gaf hy haer teenen pande
Si hadde behouden zijn lijf
|
|