Antwerps liedboek

120 Een nyeu liedeken.

1
O Tresoor mijnder herten melodien
In wiens opsien ic verhuegen moet
Wilt doch uwen dienaerr verblien
dat bidde ic v mijn liefste beelde soet
Ende neemt desen mey in v behoet
Die lustelijc staet in desen sien
Al waer mijn alder werelt goet
Mijn herte moet in v aensien altijt verblien

2
Hoe coemt lief dat ghi mi niet en troost

[fol. 67v]

 

Daer ghi mi siet in desen allende

 

den mey te planten hebbe ick ghegloost

 

God wils mi gonnen tot goeden eynde.

 

Desen mey ick ionstelijck tuwert seynde

 

Wt liefden so minne toebehoort

 

O Venus wildi mi met allen scheynden

 

So blijf mijn herte in drucke versmoort

 

 

 

3

 

O Rosier mijnder herten ghetrouwe

 

Neemt doch in dancke mijn minlic saluyt

 

V eyghen blijue ick tot uwen behoeue

 

Mijnder herten sidy een conduyt

 

Ontfaet den mey die lustich spruyt

 

Ic wil hem v schencken tot uwer eeren

 

O Venus hadde ic mijns liefs ghebruyck.

 

Alle vruecht soude in mi vermeeren

 

 

 

4

 

O bloemkens die spruyten int groene dal.

 

daer menich amoreus herte verkeert

 

Ende menich minnaer brenghet misual

 

Bi nijders die therte verteert

 

Al staet den mey in vruechden vermeert. |

 

Een droef herte en mach niet verblijden.

 

Ten doet Venus die alle duechden leert

 

Door zijns liefs aensien tot allen tijden

 

 

 

5

 

O roose bloeme prieel van waerden

 

Engien mijnder herten confoort

 

Ontfaet van mi desen mey in duechden

 

Ende geeft mijn herteken een troostelijc woort.

 

alle droefheyt worp ic ouerboort.

 

Ende in v wil ic mi seluen veriuechden

 

Al waer mijn herte in druck versmoort

 

Als ic v sie so moet ick verhuechden

 

 

 

6

 

O lieflijcke tijt schoon ende lustich

 

Wie soude zijn hi en soude hem verhuechden.

 

Als twee minnaers moghen comen rustich

 

Den mey te planten altijt in duechden

 

Elcx herte dunct mi in duysent vruechden

 

Als si malcanderen haer oochskens toogen.

 

O venus wat doet ghi door v vermoghen

 

Door v is so menich goet herte bedroghen