Antwerps liedboek
(2001)–Anoniem Antwerps liedboek–
Auteursrechtelijk beschermd
[Folio 63v]
| |
Reyn bloeme yent seer excellent
Door amoreusheyt schoon creatuere
mijn herteken laet ick bi v ontrent
3
Ghi zijt die liefste ghi sultse blijuen
Spijt diet benijt het moet ymmers zijn
Het is mi solaes bi v te wesen
Als liefde met liefde geloont mach zijn
4
Ghi zijt die liefste int herte gepresen
Bouen siluer gout oft peerlen fijn
Ick hope ick sal noch bi v slapen
Oft craey en sal gheen voghel zijn
5
Vrou venus pacxken heb ic gheladen
Ic ben die ghene diet draghen moet
Al in mijn herteken ligdy begrauen
Ghi zijt die ghene diet mi doet
6
Reyn lieflijck beelde v minlijck wesen
Verdrijft den rouwe van dat herte mijn
Als ick mach comen al sonder vreesen
Ghi zijt mijn troost mijn medecijn
7
Ic hebt gheleert ick salt onthouwen |
Hebbe ict anders wel verstaen
Dat heete liefde wel mach vercouwen
Mer reyne liefde en mach niet vergaen
8
Adieu schriue ick met droeuen sinne
Lief peynst om mi als ick om dy.
Met quade tonghen draecht reyne minne
mijn herteken laet ick v altoos bi.
|
|