Antwerps liedboek

108 Een nyeu liedeken

1
LUstige gheestkens amoreus
Auentuerieus int werck van minnen
Ic bidde v met herten coragieus
dat ic vlus troost mach ghewinnen
Mijn sinnen zijn mi so vast gheleyt
Aen een die mi so wel ghereyt
Steruen sal ic moet ic niet
Triumpheren bancketeren met mijn boel houeren
Want si lust alle mijn verdriet
Als si eens vriendelick op mi siet

2
Al had ic alder werelt goet
In mijn behoet ende ic moet steruen
dat bi zijn van minen lieue soet
Sonder moet so soude ic deruen
Verwermen sal ic als ic mach
mijns liefs troost al sonder verdrach
Steruen sal ic moet ic niet. etcetera.

3
Die aerdighe brieuen die si mi sandt |
In mijn hant ende die amoreuse tale
Si hout mijn herte in haer bedwanck
Ghewont ben ic met Venus strale.
Ick en salts haer niet af gaen
Altijt tot haren dienste staen
Steruen sal ic moet ic niet. etcetera.

4
Ick sal alle mijn leuen lanck
der liefden dranck sonder versaden
drincken al souden mijn sinnen cranck
In liefs bedwanc bliuen versmaden
In staden sal ic altoos staen
die mi met minnen heeft beuaen
Steruen sal ic moet ic niet. etcetera.

5
Sulck in venus booeken toeyet
Hem vernoeyt lustich hanteren
Als ic daer mede ben ghemoeyt
Therte doorgroeyt ic en cans bestieren
Roseren sal ic in alder tijt
Na liefs danck der nijders spijt
Steruen sal ic moet ic niet. etcetera.

[fol. 61v]

 

6

 

O Venus met uwen strale fel

 

Gheeft beuel mijnen lieue alteenen

 

Dat si mi minne ende nyemant el

 

Met herten snel al sonder vereenen

 

Verleenen willet mi gestadich

 

Ende tot mi also genadich.

 

Steruen moet. etcetera.

 

 

 

7

 

Princelijck lief vol alder duecht

 

Als ghi moecht wilt mi bi blijuen

 

Want bi v mijn sin verhuecht

 

In ghelijcke vruecht doet ghi mi bedriuen

 

Schriuen sal ic met bloede root

 

V eyghen te zijne tot in mijn doot

 

Steruen sal ic moet ic niet. etcetera.