Antwerps liedboek

100 Een nyeu liedeken.

1
ICk seg adieu.
Wy twee wi moeten sceiden
Tot op een nyeu
So wil ic troost verbeyden
Ic late bi v dat herte mijn
want waer ghi zijt daer sal ic zijn
Tsi vruecht oft pijn
Altoos sal ic v vry eygen zijn

2
Mijns sins ghequel
dat doet mi dicwils trueren
Haer liefde rebel |
Die doet mi therte schueren
tsceiden van v doet mi den noot
ic blijf gewont ic segt v bloot
Schoon bloeme minioot
v eygen bliue ic tot inden doot

3
Ic dancke v lief
Reyn minnelic lief gepresen
Voor alle grief
So wilt mi doch ghenesen.
dese niders fel met haer fenijn
Si hebben belet ons blide aenschijn
Op dit termijn.
altoos sal ic v vry eygen zijn.

4
Mijn hop mijn troost
Fortuyne sal noch keeren
Lief op mi gloost
So sal mijn vruecht vermeeren.
al moet ic deruen mijn conroot
Ende blijuen in dit lijden groot.
Swaerder dan loot |
V eygen blijf ic tot inde doot

5
Adieu van mi
So zijt ghi nv gescheyden
Een ander met dy
sal hem nv gaen vermeyden
Coragieus gelijc deuerswijn
Een amoreus cranselijn
Puer ist van dijn
Altijt sal ic v vrij eyghen zijn

6
Adieu schoon stadt
Adieu prieel vol vruechden
Reyn maechdelijck vat
Daer wi tsamen verhuechden
Gedenct den troost die ghy mi boet
Ghi zijt mijn lief die ic noeyt en vloot
Ic segt v bloot
v eygen bliue ic tot inde doot