Antwerps liedboek(2001)–Anoniem Antwerps liedboek– Auteursrechtelijk beschermd Vorige Volgende 55 Vanden Leeraer opter tinnen 1 HOe luyde sanc die leeraer opter tinnen So wie met sonden is beswaert God laet hem wil verwinnen Ende keere zijn herte tot gode waert Eer hem die doot den wech ondergaet Si zijn wijs diet connen versinnen 2 Och edel mensce denct dat ghi moet steruen En maect ghi v niet van sonden quijt | Gods rijcke moet ghi deruen Ghi hebt dicwijls versuymt den tijt Ten si door gods genadicheyt Die helle moet v eruen 3 Ende dat verhoorde een iongelinc ionc van iaren. Leeraer seyt hi doet mi gewach Hoe moechdy dus gheberen Ick sal noch leuen menighen dach Ende hebben blijschap als ick plach Daer na met gode varen 4 Die Leeraer sprac dat is seer hooge vermeten Waer zijn v ghesellen nv Die bi v waren gheseten Si hadden der iaren so veel als ghi Waer zijn si nv berechtes mi Die wormen hebbense gheten 5 Die iongelinc sprac mi en can mi niet ontbringhen Ic wil gebruycken dat leuen mijn Met dansen ende springhen Si moeten steruen die veyghe zijn [Folio 32v] [fol. 32v] Laet ons gaen drincken den coelen wijn God sal ons wel ghehingen 6 Die Leeraer sprac dit leuen en mach niet dueren Mer het verkeert so menichsins In also corter vren Waerdy vanden sinne mijn. Als ghi mi dunct vol sonden zijn Ghi en soudt niet doen dan trueren 7 Die iongelinc sprac men can mi niet ontraden Dat ic dese werelt soude scheyden van. Ende leuen in versmaden Ic sal mi beteren als ic can. der werelt vruecht ende haer gespan. En can ic niet versaden. 8 Die leeraer sprac ghi dunct mi buyten keere dat ghi der werelt vruechden kiest. Voor dat leuen van onsen heere Siet dat ghi so niet en riest dat ghi dat rijcke goods verliest Dat dueren sal ymmermeere | 9 Die iongelinc sprac sal ic gods rijcke deruen So claech ic mijnder armer sielen misual dat ic sal moeten steruen Ic hebbe gemist den rechten pat Wat sal ic doen berecht mi dat Dat ic schouwe der hellen eruen 10 Die leeraer sprac wildi in duechden risen den rechten wech te gode waert Wil ic v so gheenre wisen daer nemmermeer en is verdriet doet altoos wel en twifelt niet God sal v siele spijsen 11 Die ionghelinc sprac sal ic zijn verloren So mach mi wel rouwen dat leuen mijn. dat ic oeyt was gheboren Ic wil schouwen der hellen pijn So dat mijn arm siele mach zijn. Hier na met gode vercoren 12 Die leeraer sprack wildi v sonden gaen bedincken Ende leuen op gods genadicheyt [Folio 33r] [fol. 33r] Sijn rijck sal hi v schincken Siet dat ghi v daer toe bereyt Oft ghi moet voorwaer gheseyt In die eewige allende sincken. 13 Die iongelinc sprac die werelt wil ic laten Ick wil gode dienen altijt In minnen ende in charitaten Ende draghen eenen grauwen rock Al waer ic alder werelt iock Ic hope het sal mi baten 14 Die leeraer sprac ghi segt alte wale Doet der werelt sonden af Het brenget v in die sale Daer gods enghelen singhen lof Doet altoos wel quijt v belof Ende schouwet der hellen quale 15 Die iongelinc sprac die quale moet ic scouwen Ic wil gode dienen altijt Die werelt wil ic verdouwen Ende maken mi van sonden quijt | Dat ic van gode niet en hoore verwijt Ick duchte het soude mi rouwen 16 Die leeraer sprac ouerdencken wi onse sonden Ende dienen den here met herten deuoot Die doorsiet alle gronden Ende beteren ons met haesten groot Eer ons coemt aen die bitter doot Wi worden salich vonden Vorige Volgende
Auteursrechtelijk beschermd Auteursrechtelijk beschermd Auteursrechtelijk beschermd
Auteursrechtelijk beschermd
Auteursrechtelijk beschermd