Antwerps liedboek

43 Een nyeu liedeken

1
EEn nyeu liet wil ic beghinnen.
Ende al met gansscher duecht|
Om die liefste die ick beminne.
Want si mijn ionck herte verhuecht
Si heeft mijn herte beuanghen
In also corter stont
Al valtese mi so stranghe
Na haer staet mijn verlanghen
Want si mijn ionc herte doorwont.

2
O suyuer bloemken reyne
Laet uwen troost gheschien
Want ghi zijt die ick meyne
Ende ick v mijn ioncste bie
Om v ligghe ick in trueren
Des nachts ende daer toe dach
Moechdy mi niet ghebueren
So dunct mijn herte schueren
Dat ic v noyt en sach

3
Vrou venus die goddinne
Die en is oock niet so schoon
Als mijn lief die ick minne
Si spant int herte die croene

[fol. 24v]

 

Mocht ic mi gaen vermeyden.

 

Al met dat vroulic graen

 

Nv moet ic van haer scheyden

 

Maria wil haer geleyden

 

Si cost mi so menighen traen

 

 

 

4

 

Adieu reyn eglentier

 

Adieu reyn balsomeye

 

Adieu reyn violier

 

Adieu reyn acoleye

 

Adieu mijn wtuercoren

 

Tot op een ander termijn

 

Ic en geefs niet al verloren.

 

wi sullen noch vruecht orboren

 

ende met genoechten zijn.

 

 

 

5

 

Hi nam dat vrouken schoon

 

Al bider witser hant

 

Wat gaf hi haer te loone

 

een kindeken so playsant

 

Ic wilt met haer gaen wagen

 

ende drincken den coelen wijn |

 

Ondanck mijnn vrienden ende maghen

 

Ick sal v een kindeken dragen

 

Ghi sulter die vader af zijn

 

 

 

6

 

Shoon lief hoort mi ghewaghen

 

Wel edel ioncfrouwe fijn.

 

Ist dat ghi nv sult draghen.

 

So cleynen kindekijn

 

So en sal ick v niet laten

 

al waren mijn vrienden also quaet

 

Ic bid v wt caritaten

 

Schoon lief coemt mi te baten

 

Want ghi zijt mijn toeuerlaet.

 

 

 

7

 

Al die dit liedeken dichte

 

dat was een ruyter fijn

 

Hi maectet also slechte

 

Ter eeren die liefste zijn

 

Hi heuet so wel ghesongen.

 

Hi singet mer lancx so meer |

 

God sceynde quade nijders tonghen

 

Si hebben hem lange bedwonghen

 

God verleen hem pays en eer.