Amoreuse liedekens

Een nieu Liedeken.
[O Rooskens root, o peerle jent]

O Rooskens root, o peerle jent
Lief minjoot daer ick om ly torment
Schoone Goddinne ick blijf gheschent
Want mijn lijden is sonder ent
Nacht ende dach, doe ick geclach voorwaer
Om dat ick schey van u o Maecht eerbaer.

Moet ick nu scheyden, ist nu den tijt

Sonder verbeyden, ofte respijt.
Mijn hert van droefheyt int Lichaem splijt
Mijn Oochskens ick aen stucken crijt
O scheyden fel die my ghequel doet aen
'kEn weet hoe dat icket sal connen bestaen.

O wreede dach, ongheluckighe uyr

[p. 46]

 

Dien ick oyt sach, ghy valt my soo suer,

 

Want tdunckt my te zijn teghen natuer

 

Dat ick nu moet u maechdeken puer,

 

Segghen adieu, op een nieu, tot u

 

O bittere doot, waer nae soo beydy nu.

 

Princesse schoone dit versint

 

Ghy spant de croone en zijt bemint,

 

Want ick ben niet ghelijck den wint,

 

Ghy staet altijt int hart gheprint

 

Ick sal ghetrou o schoon Kersou, u zijn

 

Al valt my tscheyden alsoo groote pijn.