Amoreuse liedekens(na 1613)–Anoniem Amoreuse liedekens– Auteursrechtvrij Vorige Volgende O Maghet schoon mijn lief bemint, Hoe meuchdy my des persequeren De Minnaer. O Maghet schoon mijn lief bemint Hoe meuchdy my des persequeren Wt liefden heb ick u seer besint Ick mach niet langher absenteren, Mocht ick met u eens gaen spaceren In Venus bogaert spelen gaen Ick meen ick sou u soo wel tracteeren Dat ick in u gracy soude staen. De Maecht. Ionckman wat weet ghy wat ick bemin, Daer ghy mijn hart mee sout connen vermaecken, 'tGheen dat ghy prijst in uwen sin Dat sou ick moghelijck verre laecken: Daer al mijn sinnekens geheel na haecken Dat is een ander hoort mijn bediet Dat ick gekoockt heb, sou u niet smaecken Na mijn cleyn bier en dorst ghy niet. De Minnaer. Mijn alderliefste lief met accoort En hoordy niet mijn droevich claghen Aenmerckt ghy niet mijn liefde groot Die ick soo langhe 'tuwaerts heb gedragen, [pagina 44] [p. 44] Wt rechter liefden coom ick u vraghen Laet ick doch recht uwen sin verstaen Sal ick noch langher moeten jaghen Eer ick u lief sal connen ghevaen. De Maecht. Ionckman hoe sou ick soo terstont Mijn rechte meeninghe openbaren Oprecht en ken ick niet uwen gront Oft ghy u met my sout willen paren Al zijn u woorden schoon int verclaren Oprecht en ken ick niet u verstant Ghy sout u moghelijck seer beswaren Dat ick u lief bleef aen de hant. De Minnaer. Schoon lief siet ghy my daer voor aen Dat ick gheveynsde spreken Soo en is noch mijn liefde saen Van u jonck hert niet ontsteken Waer isser oyt aen my ghebleken Dat dobbelheyt uyt my is ghevloeyt Mijn jonck-heyt dunckt my van rouwe te breeken Dat ghy alsulcx op my vermoet. De Maecht. Ionckman het is wel eer gheschiet Datmen alsulcx heeft sien hantieren, Oft ghy't oock doet dat en weet ick niet Oprecht en ken ick niet u manieren Ist dat ghy zijt van Venus scholieren Soo draecht altijt een heusschen mont Iae alle couragieuse dieren Sullen u beminnen in haren gront. De Minnaer. Mocht ick een troostelijck woort ontfaen, Van u schoon lief't eenighen daghen Ick sou het als een peerelken saen In mijn jonck hert stille draghen Daerom schoon lief verhoort mijn claghen En siet mijn bitter daghen aen Sal ick noch langher moeten jaghen Eer ick u lief sal kunnen ghevaen. De Maecht. Een schat diemen soo lichtelijck vint En houtmen niet van soo grooter waerden Dan eenen die men suerlijck wint Met grooten arbeyt op deser aerden [pagina 45] [p. 45] Daermen in liefden wil volherden En tot den eynde versevereert Wy sullen malcanderen noch wel gewerden Heeft het den Heer so geordineert. De Minnaer. Schoon lief dat suldy mercken wel Dat ons de Heer heeft ghevoecht te samen Waerom valt ghy my dus rebel En quest mijn hert met duysent tranen Laet ons vrymoedich sonder schamen Malcander omhelsen uyt liefden reyn Al waert datter duysent quamen. Ghy zijt de liefste in 'swerelts pleyn. De Maecht. Heeft ons de Heer soo geordineert Dat wy twee een paer souden wesen Soo is u begeerte geconsenteert Want ick u oock heb uytghelesen Wt rechter liefden gheve ick desen Mijn trouwe tot eenen seeckeren pant Want ick en weet geen liever ghepresen Hier beneden in't 'swerelts lant. De Minnaer. Princesse jent wel schoone Bruyt Ghy hebt verhoort mijn droevich karmen Ick heet u willecom over luyt Ick ontfangh u lieffelijcken in mijn armen Het vyer der liefde sal ons verwermen Als wy ghebruycken malcander soet Laet ons als Bykens te samen zwermen Om te verweeken vreuchde goet. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij