Amoreuse liedekens
(na 1613)–Anoniem Amoreuse liedekens–
Auteursrechtvrij
[pagina 3]
| |
Op de wijse: Met gantscher bedruckter.
ALtijt heb ick gheneught gepresen,
Druck noch leyt quam noyt in mijn,
Mijn dansen, springen, singen, leesen
Was al vreught sonder pijn,
Lustigh van sinne, vrolijck van minne
Heb ick gheleeft eenpaer,
Maer mijn godinne, doet mijn ghewinne
Een droevigh nieuwe Iaer.
Mijn sussen, kussen, speelen, klincken
En het loncken gins en weer,
Mijn boerten, jocken, loncken, wincken
Mach haer niet vermaken meer,
Dit doet doorkerven, al mijn vreught sterven
Die ick bedreef om haer,
Dat ick moet derven, sal een ander erven
Tot zijnen nieuwe Iaer.
Nochtans en can ick niet misprijsen
Mijn goede liefkens waerdicheyt,
Die sy altijt ginck bewijsen, met beleefde aerdicheyt,
Al gaetse stieren haer fraey manieren
Soo vriendelijck tot een aer,
Noch wil ickse vieren oftse eens mocht kieren
Int een oft ander Iaer.
Ick schrijft mijn lief tot geen ontrouwe
Dat sy my verlegen laet,
Want sy is een schoon Vrouwe
Cloeck, verstandich, soet van praet,
Weert meerder eeren, dan haer te verneeren
Om my te nemen waer,
Dat met hoveren, ick noch can triumpheren
Met haer int nieuwe Iaer.
O Venus geeft my weer een ander
Die mijn sin dan dies vergaet
Of helpt ons beyde weer aen malcander
Met haer wil en vrienden raet,
En dat sy lyen, mijn gunstich vryen
In deughden kuys eerbaer,
En ic my mach vlijen, dicht onder haer zijen
Van t' een Iaer int aer.
|
|