Amoreuse liedekens

Een oudt Liedeken van het Nederlant,
[Och Nederlandt ghepresen]

Op de wijse: Ick en ben niet als een Pluyme.

OCh Nederlandt ghepresen
Beclaecht moocht ghy wel zijn,
Ghy placht die fleur te wesen,
Van alle landen fijn,

[p. 107]

 

Maer nu zijt ghy int ghepijn,

 

Door beroerte op dit termijn

 

Helpt ons Hemelsche Medecijn.

 

Och hoe rebel staen al dees landen

 

De ghemeente blijft desolaet,

 

Veel sitten nu met ydel handen,

 

Den Ambachts-man schijnt desperaet,

 

Och Philippus Conincklijcke zaet

 

V Ghemeynte schier al vergaet,

 

Comt en besettet met uwen wijsen raet.

 

Moet desen tijdt noch langhe dueren

 

Soo naeckt ons groot verdriet,

 

Den armen moet al besueren

 

Die en vint nu te winnen niet,

 

O Godt dit werck nu aensiet

 

Al ist dat ons groot leet gheschiet

 

Wy moetent al verdraghen siet.

 

't Comt al by onse sonden

 

Dat de neeringe leyt onder de voet

 

Wy zijn vol nijt bevonden

 

Hier om comt ons dit teghenspoet,

 

Bidt Godt om ghenade soet,

 

Die den mensche spijst en voet,

 

En den armen bystant doet.

 

Och nobelen Coninck van Spaengien,

 

Brenght ons den Peys int Lant,

 

Wy hebben langhe met Canallen,

 

Gheleeft aen elcken cant,

 

O Hemelsche Vader triumphant

 

Doet u volck doch onderstant

 

Die noch sitten in lijden gheplant.

 

Waer is den Oosterlinck bevaren

 

Die ons bracht Speck en Graen,

 

Den Hollander die leyt in bezwaren,

 

Den Zee-lander en mach comen noch gaen

 

Moet desen tijdt noch langer staen,

 

Soo moeten wy schier al vergaen

 

Het cost ons menighen traen.

 

Den Zee-man gaet schier verlooren

 

Qualick mach hy winnen zijn Broot,

 

Hoe soumen vreucht oorbooren

 

Veel volcx is levende doot,

 

Want sy worden naeckt en bloot

 

Soomen siet in dit conroot,

 

Helpt ons Godt uyt desen noot.

 

Waer eens de Zee ontsloten

[p. 108]

 

Soo mochten wy hebben goeden tijt,

 

'Theeft menich Coop-man verdrooten

 

Die nu doen cleyn profijt,

 

Waer hy gaet breet ofte wijt

 

Zijn goet en wort hy nau quyt

 

Hoe soudemen daer connen wesen verblijt.

 

Oorlof aen groot en cleene,

 

Laet ons doch bidden allegaer,

 

Dat hy ons wil alle ghemeene

 

Helpen uyt dit groot lijden zwaer,

 

Want Godt is den Middelaer

 

Diet peyseren can voorwaer

 

Dees beroerte veer en naer.