Amoreuse liedekens

Een oudt Liedeken.
[Margrietgen ghy zijt soo hubschen dier]

MArgrietgen ghy zijt soo hubschen dier,
Ghy hebt twee bruyn Ooghskens
Die ick gaerne aensie,
Reyne Vrouwelijck dier
Soudy niet willen scheyden eer lanck
Inden Krijch sal ick u leyden lief ist u danc.

Al inden Krijch wil ick zijn

Men schenckter die vrome Lants-knechten
den Wijn, Reyn vrouwelijck fijn,
Al onder de blau Lants-douwe voorwaer,
Daer is ghebreck van Vrouwen,
Schoon lief had ick u daer.

Margrietgen wout ghy met my gaen

Ick soude u leyden al voor Terwaen,
Reyn Vrouwelijck graen
Daer sullen die Lants-knechten neven u staen,
Sy en sullen u schoon Lief tot gheender noot afgaen.

Al voor Terwaen daer is grooten noot

Men slater die vroome Lants-knechten al doot
Cleyn ende groot,
Te voet en oock te paerde gaet mee
Schoon lief rijdt uwer vaerden laet my met vre.

Margrietgen woude ghy met my

Veel voorder soude ick met u gaen
Begeerdijt op my,
Soo gaet hem af ende blijf by my,

[p. 104]

 

T'is al verlooren dat ic doe schoon lief om dy.

 

Margrietgen wilt ghy my trouwe zijn,

 

V eygen sal ick sijn tot int eynde mijn

 

Schoon vrouken fijn,

 

Zoo gevet my die trouwe dijn,

 

So derren wy niet achten op der nijders fenijn

 

Maer die dit Liedeken eerstwerf sanck,

 

Dat was een Ruyterken uyt west-lant

 

Vry ende vranck, zijn leven dat viel hem veel te lanck,

 

Om dat hy haer moest derven tegen zijnen danck.