Amoreuse liedekens
(na 1613)–Anoniem Amoreuse liedekens–
AuteursrechtvrijOp de wijse alst begint. Ghemaeckt van een Ionghe Dochter.
GHy nijders quaet van doene,
Van 'sVyants aert meucht gy wel zijn,
Ghelijck de Schorpioene
Met haer steert steken fenijn,
Al hebt ghy nu de wille van mijn,
Het mach noch dueren een kort termijn,
Alle dinck en sal niet eeuwigh zijn.
Ick had u uytverkoren soete Lief,
Die tijdt is nu gepasseert,
Ick mach sien noch hooren u brief,
't Is al gevioleert,
't Is al verlooren, 'tis al verteert,
Die in dit Boeck van minnen studeert
Hy vint hem selven geabsolveert.
Ick heb om uwent wille goet lief,
Die hant geslagen aenden ploegh,
Doen ick u lestmael loofde met gerief
Dat geschiede des morgens vroegh,
'tIs hier, 'tis daer, met vint een behoef,
Schoon lieveken hebt ghy Ziels genoegh
Ick vinde my selven geen troost behoef.
Mijn Vrienden en magen goet lief
Die zijn mijn tegenspoet,
Een ander weder te kiesen tot gerief,
Die minne was niet soo soet,
't Is al om 't vermaldedijde goet,
Die altijdt raet van Vrienden doet,
Sijn hert sal kiesen die hy laten moet.
Dat ghy de Kanne stille doen staen,
Dat al dat goet aenkleeft,
Al hebt ghy nu uwen wille gedaen,
'tIs dat ghy om my niet en geeft,
'tIs beter dat ghy met een ander sneeft
Dan ghy met my in onvreden leeft,
| |
[pagina 52]
| |
'tIs quaet te drincken die geen dorst en heeft.
Nu rade ick alle Vryers fijn
Die hier te dansen gaen perfect,
Ten besten laet u raden liefste mijn
Dat ghy met u trou niet en geckt,
Ghy spreeckt soo haest een woort soo net,
Worter yet belooft het wort belet
Het is een huysvrou al voor Gods Wet.
|
|