|
| |
| |
Dat .lxvij. capittel Vanden aertshertoghe Philips van Oostenrijck, ende hoe hi tweeweruen reysde in Spaengien Ende hoe hi coninc van Spaengien wert
MAximiliaen die keyser als hi lange absent geweest hadde van desen landen so quam hi neder met sijnder nyeuwer huysurouwen des hertogen dochter van Melanen, eerst in Brabant met grooten state van princen prelaten ende edelen Ende hertoge philips sijn sone, mit vrouwe margriete sijnder suster reysden haren vader int gemoete tot Maestricht, daer nae quamen si met alle den state tot Louen. Als si nv te Louen ghecomen waren so was daer groote ghereetscap ghemaket om hem met eeren te ontfanghen Ende doe wert hertoge Philips ontfangen ende ghehult met groter feesten ende blijtscappen hertoghe van Brabant, oudt sijnde .xvi. iaren, ende daer na ooc in Vlaenderen ende ooc desgelijcx in anderen landen, als in Henegouwe, Hollant Zeelant. etcetera. ende in die steden van sinen landen. Dit geschiede in ons heren iaer M.CCCC.xciij.
| |
| |
¶ Jtem na dat lange oorloge geweest hadde in Pycardien ende ooc ter zee, daer dye Hollanders ende Zeelanders grote scade bi namen. Ende ooc bleef den dieren tijt vanden koorne in desen landen geduerende, want men wt vrancrijcke gheen koren in desen landen bringen en mochte. So wert te Senlis in Vrancrijcke gemaect een vergaderinge van gedeputeerden in beyde sijden. Ende na lange sprake wert daer eenen pays gemaect, daer onder veel ander puncten ghesloten was, dat soe wanneer hertoge Philips den coninc homagie doen soude van te leene ontfangende Vlaenderen, Artoys, ende Charloys. etcetera. dan soude hem dye coninck weder ouer gheuen die steden van Arien, Betuynen, Hesdijn. Ende als van tshertochdom van Bourgondien ende onder gheschillen in beyde sijden en soude men met ghenen wapenen mogen versuecken, anders dan bi wegen van iusticien oft van vrientschappen. Desen pays wert besworen in beyde sijden, ende daer worden veel coninghen, princen, ende andere heeren in begrepen. etcetera.
| |
¶ Hoe coninc Karel van Vrancrijck selue in persone conquesteerde dat conincrijck van napels
WAnt die ionge coninc Karel inden sin begrepen hadde dat conincrijck van napels te conquesteren als hem opgedragen van coninc Reinier sinen ouden oom die recht coninc van Napels ende Secilien was. Als daer toe ooc verwect ende ghebeden van den paus Alexander ende heer Lodewijc van Mylanen die momboor was vanden iongen hertoge van mylanen So dacht hi vele pays te maken metten coninc ende coninghinne van Spaengien ende Arrogon ende gaf hem ouer dat lant Roussillon Perpinianen. etcetera. dat hi ende sijn vader langhe ghehouden hadden voor veel dusent cronen, die hi der coninghinnen liberalic schanck meynende eewigen pays met hem lieden te maken, mer het quam daer na al anders. Die coninc track doe tot Lyons ende hi versandt sijn volck daer wel .x.M. Switsen mede waren, ende hi volchde met groter macht door tgeberchte van Sauoyen ende quam in pyemont tot vercelles, daer heer Lodewijc van Mylanen tot hem quam. Dair na wert hi seer feestelijc ontfangen tot Pysen tot Florencen ende ter Seynen, ende die hertoge van Orliens bleef leggen in Pyemont in sijn landt van Ast. Ende want die paus Alexander corts pays gemaect hadde met coninc Alfonso van Napels die lange die Roomsche kercke gepersequeert hadde, so was den paeus berouwen dat hi den coninc van vrancrijck gheroepen hadde Ende daer om wert ontboden te Rome dye hertoge van Calabren coninck Alfonsus sone noch ionck sijnde teghen den coninck van Vrancrijck Maer hi te Rome sijnde met groter macht verstont dat die coninc Rome nakende was ende dat die romeynen ghesint waren die Fransoysen inne te laten, so vloot hi wt Rome Ende inden iare M cccc.xciiij. opten iaers auont quam die coninc binnen Romen ende dede daer scarpe iusticie. Ende het wert ghemaect dat hem dye paus minlijck ende vrientlijck ontfinck Ende hi maec- | |
| |
te tot sijnder begheerten .iij. Cardinalen Ende bi sekere condicien gaf hi in des conincx handen des groten turcx broeder, den hi daer te voren in Vrancrijcke sijnde vanden groten meestere van Rodes ontfangen hadde ende den paus Jnnocentius ghesonden hadde Ende desen turck begeerde de coninc te hebben, om daer mede alst tijt ware op den groten Turck te trecken, want sijn lant dat hi vanden kerstenen ghewonnen heeft streckende is aent lant van Napels, Maer wt nijde werdt hi van eenighen vergheuen met subtilen venijne, dat niet en wrachte voor dat die coninc te napels was ende daer sterf die Turck, ende men seyde dat des paus sone die doen cardinael was dat hadde laten doen. Aldus schiet coninc Karel van den paus ende track met sijnen volcke na Napels door de campanie Ende hi wert ontfangen tot Aquila, maer die stede tot sint Germayn die haer opposeerde wan hi met assaute. Als coninc Alfonse van napels dat vernam die een quaet tyran was, ende van sijn volck seer ghehaet so vloot hi in Sicilien daer hi sterf Ende die hertoge van Calabren sijn sone vloot dair na ooc ende leefde ooc niet lange So wert coninc karel met groter blijtscap vanden volcke binnen die machtige stede van Napels ontfangen Ende hi creech ooc die stercke castelen daer aen staende dye onwinlijck sijn. Ende hi mineerden die sware tributen daer si mede bedruct waren vanden coninc Alfonse. Daer na creech hi Poellien Calabren ende Lucanien
¶ Desen voorspoet van coninc Karel mishaghede seer sijnen heymelijcken vianden, sonderlinge den paus Alexander metten Venetianen, metten roomschen coninc ende den coninc van Spaengien ende heer Lodewijc voocht van Mylanen, dye maecten een verbont tegen den coninc van vrancrijck te samen die te voren meestdeel vrienden scheenen Ende die passagien in Jtalien ende lombardien werden den Fransoysen gesloten Doe was dye hertoghe van Orliens ghetrocken int lant van Mylanen als rechte erfghename vanden lande van sijnder grootmoeder wegen, ende hi quam in dye stadt Nouarre. Daerin sijnde wert hi belegen van heer Lodewijc van Mylanen, daer hi met sinen volcke groot gebreck van vitalien leet.
¶ Dese dingen aldus staende so versach coninc Karel die stercke plaetsen van den lande met garnisoene ende capiteynen Ende hi ordineerde heere Gylbert van Bourbon graue van Mompensier sinen stadthouder int landt ende hy track met sinen anderen volck na Rome ende dede die poorten sluyten. Mer die romeynen lieten den coninc in comen ende hi gaf die steden weder om ouer der kercken die hi vanden paus ontfangen had, wtgenomen Ostien dat hi vanden cardinael van Ostien Julianus dye paus namaels wert ontfangen hadde. Als hi dan wt Rome getrocken was soe sandt hi bi rade des seluen cardinaels die sijn vrient was sinen oom here Philips van Sauoyen graue van Bresse met .vi.M. man om te Genues ontfangen te werden, twelck also niet en quam. Daer na quam die coninc totter Seynen ende van daer tot Fornouen by Permen int lant van Mylanen Ende doen verstont hi dat dye Venechianen met haren ghesellen sinen wech hadden belegen wel sterck sijnde .L.M. mannen. | |
| |
Ende de coninck en hadde doe ter tijt maer .viij.M. mannen die wtgelesen waren vanden besten, maer si waren seer vermoeyet ende onuersien van vytalien So wilde die coninc sijn vianden haestelijck bespringhen, want al was hi cleen, nochtans so was hi seer grootmoedich ende vroom. Ende eerst sijn vyanden met serpentinen beschietende so sloech hi met sijn volcke daer op Daer waren omtrent vijf dusent ytalianen ende Lombarden verslaghen met veel merquisen ende edelen sonder yemant gheuanghen te nemen. Dye coninck was nochtans in perikele, en hadde die bastaert van Bourbon ghedaen die hem beschutte, want hi al gewapent was ghelijck die coninc ende hi wert gheuangen wanende die vyanden datse den coninc hadden Ende also doorbrack dye coninc passerende door een cleyn riuiere met sinen volcke ende quam tot Ast in Pyemondt. Jn die voorseyde battalie en werden niet veel Fransoysen verslagen, mer die coninc verloos veel bagagien ende iuwelen. Doe was heer Lodewijc van Mylanen seer veruaert beduchtende dat die coninc te Nouarre comen soude om den hertoghe van Orliens te verlossen die aldaer beleghen was, ende hi maecte tractaet metten coninc ende die hertoge wert verlost Ende want dye ionge hertoge van Mylanen ghestoruen was bi verghiffenisse oft anders so maecte heer Lodewijck sijn oom hem seluen hertoghe die dat volck seer bescatte met tributen ende tallien so dat hi seer verhaet was
¶ Jtem als coninc Kaerle langhe tijt in Pyemont gelegen hadde so quam hi in vrancrijcke tot sinte Dyonijs ende van daer tot Amboyse. Corts daer na verstont die coninck dat Napels hem af ghegaen was, ende dat dye graue van Mompensier ghestoruen was, ende dander cpaiteynen quamen weder totten coninc in Vrancrijck. Coninc Kaerle sijnde tot Amboyse met sijnder coninginne omtrent Palm dach, ende siende caetsen in sijn hoff wert bestaen met haestiger siecten, want sijn natuerlijcke vochtheden comsumeert waren ouermidts onghetemperde onsuuerheyt, dat hem alle sijn leden besweken ende starf binnen vijf oft ses vren daer nae oudt sijnde .xxvi. iaer Jnden iare ons heeren M.CCCC.xcvij. Ende corts daer na wert sijn lichaem door parijs ghebracht tot sinte Dyonijs met ontsprekelijcken pompen ende costelijken state gheestelijck ende weerlijck tot .vij.M. personen toe, ende CCCC. arme mannen met rouwe clederen droegen iiij.C. tortsen van Amboyse tot sinte Dyonijs, twelc is bi na .lx. mijlen, daer hi begrauen wert met grooter droefheit vanden volcke, want hi was seer gemint midts sijn vromicheyt, goedertierenheyt ende miltheyt. Dit voorseyt is die continuacie vander reisen conincx Karels in Napels tot sijnder afliuicheyt
| |
¶ Hoe dat hertoge Philips huwelijcte aen des conincx ende des coninginne van Spaengien ende van Arrogon tweeste dochter, ende die prince van Spaengien haer beyder eenige soon aen vrouwe Margriete des Roomsschen conincx dochter, hertoge Philips suster.
| |
| |
IN dit iaer van .xcv. in de maent van nouember is vrou margriete van Oostenrijck van bourgondien wt gegeuen ende gehuwelijct aen Ferdinant des conincx ende der coninghinne van Spaengien ende van Arrogon eenige soon Ende is vanden ambassaten van spaengen te Mechelen beslapen, daer groten staet triumphen ende feesten bedreuen worden van steken, tornieren ende andere oeffeningen
¶ Corts daer na in Januario int iaer van .xcvi. wert ooc tracteert vanden seluen ambassaten wt Spaengien tusschen hertoge Philips van Bourgondien ende vrouwe Janne des voorscreuen coninc Ferdinants ende vrouwe Ysabele coninghinne van Spangen ende arrogon .ij. dochter Ende wert geconcludeert ende gesloten in sulcker manieren datmen die dochter harwerts ouer senden soude. Ende int selue iaer in die maent van September is die voorscreuen vrou Janne wt Spangen in zeelant aen gecomen, meer dan met C. groter scepen ende met .xijC. mannen met een eerweerdich bisschop dye tot Antwerpen ouerleet, ende met meer andere grote machtige heren ende edelen met groter staet costlicheit ende chierheyt, omme tachteruolgen tselue huwelic alst voorsproken was, ende is die selue vrouwe Janne tot Antwerpen ghecomen Waer omme dat mits desen snelle boden haestelicken wt ghesonnen sijn, om hertoghe Philips die doe ter tijt noch in hooch duytslant was bi sinen vader, ende wert daer in alle die Oostenrijcse steden van sinen vader ghehult ende ontfangen geweest. Aldus heeft hertoge Philips orlof genomen aen sinen vader ende is van stonden aen in brabant gecomen tot in die stede van Liere, daer hi sinen bruyt ontboden heeft, die welke hi daer met gheenen oft luttel triumphen, state ende costlicheyt simpelic ghetrout ende beslapen heeft in die maent van October. Ende heeft aen haer gewonnen ij. sonen ende .iiij. dochteren. Dye outste soon genoemt Karel wert gheboren Jnt iaer .xvC. tusschen sinte Peeter en sinte mathijs dach, ende was een scrickel iaer. Ende hem was tot eenen wiue versekert vrouwe Glande coninc Lodewijcx dochter die .xij. van Vrancrijck dwelc casseert ende te niete gedaen wert, ende nam te man den graue van Valoys ende van Engolemme die na coninc Lodewijcx doot coninc van Vrancrijc wert Daer nae was hem te wiue versekert vrouwe Marie coninc Henricx dochter van Engelant die .vij. dwelc ooc casseert wert, ende si nam te manne coninc Lodewijc van Vrancrijck die xij. voorscreuen Ende die selue Kaerle creech naemaels te wijue die dochter van Poortegale. Die ander sone was genoemt Fernant ende was in Spangen gheboren int iaer xv.C. ende .iij. Ende creech namaels te wiue des conincx dochter van Hongarijen. De outste dochter ghenoemt Alienora was geboren int iaer .xiiij.C.xcviij. Die ander dochter was ghenoemt Johanna ende wert geboren int iaer .xvC ende een, ende hadde te man den coninc van Denemarcken. Dye .iij. dochter was geheten Maria ende wert geboren Jnt iaer .xvC. ende vi. ende hadde te man den coninc van Hongarijen. Dye .iiij. dochter genoemt Ysabele ofte Elizabeth wert geboren nae haer vaders doot in spangen, int iaer xvc. ende .vij. ende wert genoemt na vrouwe Elizabeth coninginne van spangen vrouwe iohanne moeder. | |
| |
Daer na wert vrou margriet geuoert ouer in Spaengien ende was in groot perikel vander zee, ende si troude den sone van Spaengien, daer si een vruchte af creech die ter stont starf. Desghelijcx starf haestelijc haer man die prince van Spaengien ende si bleef weduwe. Mer namaels weder ouer ghebracht sijnde in desen landen wert si bestaet aen hertoge Philibeert van Sauoyen
| |
¶ Hoe dat hertoge Lodewijc van Orliens coninc van vrancrijck wert
NA die voorscreuen afliuicheyt van coninc Kaerle die .viij. wert coninc Lodewijc die .xij. die was hertoge van Orliens ende van valoys, wiens grootvader was broeder van coninc Karel die vi. Ende hi wert te Riemen ghesacreert int iare .xcviij. na paesschen. Dese Lodewijc ionck sijnde hadde getrout vrou Johanne coninc lodewijcx dochter ende coninc karels suster die een bult hadt daer hi niet willich toe en was, twelc hi den paus Alexander te kennen gaf segghende, dat hijse wt vrese genomen ende gehouden hadde also lange als haer vader ende haer broeder leefden, begherende daer om van haer te scheyden ende een ander te trouwen. Die paus beual dese sake bi rescripte iij. bisscopen in vrancrijck te examineren, daer die bisscop van Alby een af was die een heilich man gheheeten was, ende dese saten te rechte ende hoorden die partijen Ende ten laetsten werden si beyde metten rechte gescheyden Ende die coninc troudede Blanche coninginne weduwe hertoginne van Britanien Twelc nochtans tegen die eedelheit der cronen is, want een coninginne behoort weduwe te blijven, ende dye coninc van vrancrijck en behoort geen weduwe te trouwen. Ende coninc Lodewijc gaf sijnder eerster vrouwen thertochdom van Berry haren staet op te houden, die daer leyde een heylich leuen in die stadt van Bourges,daer si namaels ouerleet
| |
¶ Hoe de roomsche coninc sloech int graefscap van Bourgondien ende hoe die pays van Senlis vernieuwet wert
OMtrent dese tijt heeft die roomsche coninc vergadert een groot heyr van volck van wapenen ende quam met machte int graefscap van bourgondien bi rade vanden heere van Vergy ende sloech voort int hertochdomme van bourgondien eenighe schade doende maer vanden fransschen capiteynen wert hi wederstaen so gheuielen dair schermutsingen Ende die fransoysen cregen dat casteel van Vergy daer si veele Alemans vingen ende meer ander plaetsen den here van Vergy toebehorende die vanden coninc geconfisceert bleuen. Als nv die coninc tot Riemen sacreert ende gewijt was tot eenen coninc van Vrancrijck, so senden die coninc Ferdinant van Spaengien ende Arrogon ende dye eedele vorst hertoghe Philips ende dye Venechianen eerbare ende notable ambassiaten tot Parijs byden nyeuwen coninck ende maecten pays met hem Ende van deser sijden was daer heer Engelbrecht graue van Nassouwe, die bi rade vanden heeren vanden houe van Bourgondien den voorscreuen pays van Senlis liet vernieuwen Maer daer wert aen ghehangen om | |
| |
vreedes wille dat byden leuenden lijue vanden coninc ende van hertoge Philipus geen vermaen gedaen en soude werden van den hertochdom van Bourgondien. Om welcken tractaet oft pays achteruolgende den tractaet van Senlis te volbrengen so was gesloten dat die eertshertoge tot in die cite van Atrecht comen soude ende aldaer homagie ende manscap den coninc doen van vlaenderen Artoys Charoldis. etcetera. inden persone van den cancellier van Vrancrijck, dat so geschiede Ende daer na dede die selue cancellier manscap den hertoge van des conincx wegen, als vanden graefschap van Bolonien dat een leen is vanden graefscape van Artoys. Ende doe dede die coninc hertoge Philips weder ouer gheuen Arien Betunen Hesdijn, also dat wt ghesproken was
| |
¶ Van coninc Maximiliaens orlogen op die Ghelderschen
DJe roomsche coninc quam neder wt Almanien in desen landen ende lach lange tot Antwerpen Ende met hem was comen die rijcke hertoge Joris van beyeren int iaer van .xcix. Ende bi hulpe van hertoghe Aelbrecht van Sassen ende die hertogen van Cleue ende van Gulic so ghinc hi oorlogen opten hertoge van Ghelre, mer si en cregen niet dan Herculeus een cleen stedeken. Ende want Kaerle die hertoge van Gelre daer die hertoge van Bourbon oom af was metten coninc van vrancrijck verbonden was, so sandt hij hem te hulpe .vC. glauien costelike toe ghemaect, dair af die principale capiteynen waren dye bastaert van Bourbon ende heer Robrecht van Arenberge heere van Hesden comende door tlant van Ludick tot Ruermonde Twelc aenmerckende die voorseyde hertoghen van Beyeren, Sassen, Cleue Gulick scheyden corts van daer Mer dair wert getracteert dat de hertogen van ghelre ende van Gulick bliuen souden int seggen van den coninck van vrancrijck ende in persone biden coninc te compareren, twelc si deden Ende die roomsche coninc was wech getrocken mits de oorloge vanden zwitsen tegens die Almans dat was seer fellic daer die switsen veel plaetsen verdoruen in Almanien ende versloegen veel Almans tot diuerse plecken. Ende op een tijt so werden daer eenige zwitsen verslagen bi hulpe vanden Remanante vander gaerden van desen lande die die roomsche coninc gecregen hadde. Mer het wert namaels getracteert bi middele vanden hertoge van Mylanen doe ter tijt wt Mylanen vluchtich
¶ So is te weten dat die coninc van vrancrijck ghedenckende hoe dat die hertoge van Mylanen hem daer te voren belegen hadde tot Nouarien als coninc karel in Napels was Ende ooc want hi erfghenaem van Mylanen was, also is voorseit so maecte hi hem gereet mit groten heyre passerende door Lyons Vandaer track hi door tgeberchte van Pyemont tot Ast in sijn lant, twelck sijnre grote moeder huwelic goet was die een dochter van Mylanen was Ende treckende voort tot Alexandrien die seere sterck gemaect was so datse den coninc niet ontfangen en wilde, daer om dedese die coninc bestormen met assaute ende si wert gewonnen vanden fransoysen ende seer ghedestrueert Twelck vernemende die voorscreuen hertoge Lodewijck van mylanen so versach hi dat seer stercke casteel van Mylanen met | |
| |
volcke ende vitalie ende vloot van daer in Almanien totten roomsschen coninc daer in hi toonde sijn grote blootheit want dat casteel onwinlic is, so datmen daer mede al Lombardijen mach dwingen, ende daer nae wert die coninck tot Mylanen ontfangen Ende want die capiteyn vanden castele dat niet ouer geuen en wilde, anders dan bi middelen van te hebben alle dat goet, twelc de hertoge daer ghelaten hadde, twelck ontallijc was So wert hem vanden coninc die helft gegeuen ende noch x.M. ducaten. Aldus creech die coninc dat casteel bider ghiericheyt des capiteynen, also die Lombaerden ende Jtalianen in gheboren is Jn dit casteel beuant die coninc vitalie ende wapenen om .ijM. menschen te houden ende wel .ij.M. bussen sonder noch vier wtnemende grote bombaerden. Corts daer na creech die coninc die ander steden ende castelen vanden lande Twelc vernemende dye Geneuoyse sonden si aen hem begeerende onder hem te staen Ende die coninc stelde hem bi eeden tot eenen gouuerneur heer Philips van Cleue van Rauesteyn sinen neue.
¶ Omtrent dese tijt so waren die fransoysen metten Venechianen seer sterck ter zee tegen die turcken, diemen seyde dat heer Lodewijc van Mylanen te hulpen gheroepen hadde tegen die fransoysen. Ende al waren die turcken in een gat versteken daerse nauwe wt en mochten, nochtans was die capiteyn vanden Venechianen so blode dat hijse niet en dorste bespringen so datse ontquamen Twelck siende dye fransoysen trocken si van daer ende wonnen Salamine dat destruerende Endedie turcken quamen tot Foriole twelc si roofden ende destrueerden veel kerstenen houdende gheuangen Mer daer werden si belegen vanden Hongeren, so datse nauwe en consten ontgaen dan cruypende ouer hoge berghen Doe doden die kersten haer prisonieren
¶ Jnden seluen iare als die cleefsche in gelderlant belegen hadden dat stedeken Dotichom, ende die gelderschen wten lande van cleue eenen groten buyt van ossen koyen ende schapen gehaelt hadden, so werden si van heere Floris van Yselsteyn ter neder getogen Daer waren veel gelderschen verslagen ende wel xvC. geuangen, onder welcke dat veel rijcke treflijcke burgers van Nimmagen waren
¶ Jtem noch int iaer van .xcix. so viel dye grote brugge ouer die Seyne tot parijs daer meer dan .lx. husen op stonden Twelc geschiede bi negligentien vanden preuoost ende scepenen van parijs, die die renten daer af toe staende tende niet bestaet noch daer op voorsien en hadden Teghen den welcken grote clachte gedaen wert voor de heren vanden perlamente, so dat si gheuangen werden ende gehouden tot dat si hair vonnisse hadden seer hert, want si werden van haer officien gheset ende werden gewesen op te rechten die scade.
¶ Jtem heer Lodewijc van Mylanen vluchtich sijnde wt Mylanen, also is voorscreuen, ende hem houdende bi coninc Maximiliaen in Almanien hadde vergadert volck van wapenen, sonderlinge eenige zwitsen die hem dienden om sijn gelt ende ooc enige vander gaerden van desen lande ende track met hem int lant van mylanen ende creech die stede van Mylanen ende dye stede van Alexandrien Nouarie ende ander plaetsen Ende vernemende dat die coninc van vrancrijck die sandt een gro- | |
| |
te heyre van Fransoysen ende ooc zwitsen weder int lant om dat weder te crigen So maecte hem heer Lodewijc seer sterck in die stadt Nouarie, so wonnen die fransoysen veel plaetsen ende quamen ooc beleggen die stadt van Nouarie die hem op gegeuen was, behoudelijc dat die zwitsen van heer lodewijcx side vrylic wt souden gaen Ende als heer Lodewijck vercleet sijnde in vreemden habite waende ontgaen so seydemen dat eenige van sinen zwitsen hem verrieden Ende so wert hi geuangen ende geuoert tot Lyons ende daer na tot parijs, ende hi lach langhe gheuangen tot Bourges ende daer na tot Angiers daer hi sterff. Ende want die venechianen doe verbonden waren metten coninc van Vrancrijck so hadden si gecregen den cardinael van Melanen geheten Ascanius dye lodewijcx broeder was ende de oorloge tegen den coninc geuoert hadde ende die veniechianen leuerden hem ooc geuangen den coninc Ende die coninc bleef hertoge van Mylanen ende hi creech ghemoet vanden roomschen coninc Maximiliaen bi middele van veel .M. cronen dat hi hem daer in vestichde want den keyserijcke aengaet. Jn dien tijden so hielt hem in vrancrijck ende tot Auignon die cardinael van Ostien Julianus vluchtich wt Rome. Ende als paus Alexander dye .vi. haestelijc te Rome ghestoruen was int Jaer ons heren .xvC. ende drie in Augusto, so reysden haestelijck tot Rome wt vrancrijck dye cardinael van Ruwaen legaet ende cardinael van Ostien totten kose vanden nieuwen paus ende liet ooc medereysen den cardinael van Mylanen voorscreuen Ende daer werde paeus ghecoren die cardinael vander Seynen, mer hi en leefde geen maent. Doe wert ghecoren die voorseyde cardinael Julianus ende wert gheheten Julius die tweeste int iaer ons heren xvC. ende drie, ende des ander dages na sinte Katherinen dach wert hi gecroont also dat ghewoon is
|
|
Auteursrechtelijk beschermd
