als hi enich officie exerceren oft doen sal Voors doe hadde dese visch een hooft, ogen, ooren, voorhooft, nuese, mont [/] wangen, scouderen, armen, handen, voeten, ende voort alle andere leden oft een volcomen ende perfect man ende bisschop waer geweest. Ende sijn casuffel worden wel op gheheuen voor ende achter totten knien toe mer niet hoger nochtans wast een cout leuende visch int aentasten, ende hi liet hem wel aentasten ende handelen van alle man ende bisonder vanden bisscopen vanden lande. Als dese visch ende bisscop den coninc van polen was gepresenteert, ende mit menigerlei talen ende spraken geuraecht worde, wie hi ware ende hoe danich, ende van waen dat hi quame, en antwoorde hi niet, ende nochtans dede hi sinen mont op eer ende reuerencie ootmoedelic bewizende die ander bisscopen die dair tegenwoordich waren. Die coninc wert tornich omdat hi niet spreken en woude ende was in meninge om hem in een kerker te setten wair wt dat die visch ende biscop seer bedroeft worde, ende dede zijn ogen toe ende en woude die geensins weder op doen also lange ende ter tijt toe dat die bisscopen vanden lande voor den coninc op haer knien vielen in presentie van desen vische ende baden den coninc ende impetreerde als datmen hem weder senden soude opten oeuer vander zee dair hi geuangen was geweest ende god die heer wiens wercken onbegripelic zijn soude tonen ende openbaren die natuere ende wercken van desen, op dat geen plage of verdriet den coninc ende zijn ondersaten daer af en quame Ende als de coninc dit consenteerde ende toe liet, terstont dede die visch sijn ogen weder open bewisende den coninc grote dancberheden ende bisonder den bisscopen. Aldus so wert daer een wagen bereyt in tegenwoordicheit van ontallike vele menschen dair die bisscopen met desen visch ende biscop op gingen sitten ende sat onder hem lieden sedelic ende manierlic, gelijc oft een redelic creatuer hadde geweest die reden gebrukende is. ende als si noch een groot stuc waren vander zee gingen si vanden wagen omdat si te voet ter zeewert wouden gaen Ende hi ginc bi hem seluen mede van die wagen ende stont recht op sijn voeten en wanderde tusschen twe bisscopen leggende den eenen hant opten scouderen vanden eenen bisscop ende die ander opten anderen. Hi wert ooc niet verstoort oft beroert ouermits die veelheyt des volcx, maer ginc manierlijc ende zedelijc als die ander bisscopen. Ende als hi gecomen was opten oeuer vander zee sach hi die biscopen ende dat volck vrientlic ende goedertierlic aen Ende nam oorlof aenden bisscopen mit groter reuerentien ende ootmoedelijken hem bughende mitten lichaem ende begheerde oorlof te hebben, ende mit dien ghinc hi alleen int water geuende den bisscopen den hant. Ende als hi totten nauel toe int water was gegaen ende hi de diepte began te voelen, verblijde hi hem ende kierde hem om totten bisscopen ende tvolck teynde verwachtende heeft hi zijn hooft seer laech gebogen tottet volc ende gaf hem die benedictie mitter rechter hant oft een redelijc ende warachtich bisscop hadde geweest, ende terstont ginc hi int water swemmen, ende en wert van niemant meer gesien. Dit voorseyde wonder heeft gesien een vermaert meester die dit aldus vertelt heeft op goeder gelouen warachtich te wesen. Ende is dit aldus voorwaer so is god wonderlijc in sijn wercken
Auteursrechtelijk beschermd
