Van Brabant die excellente cronike

¶Dat .xxx. capitel. Vanden tweesten hertoge Godeuaert, hoe hi oorlochde op Henrick van Limborch, ende hoe hi sint Truyen beleyde

NA die doot van hertoge Godeuaert metten baerde soe wert hertoge van Lothrijke Godeuaert sijn sone in tijden van keyser Coenraert dien seere beminde, ende dede hem te huwelick hebben Lutgaert hertoginne Salzenbach der keyserinnen sustere. Ende als Godeuaert een iaer hadde hertoge gheweest so begonste hertoge Henrick van Limborch op hem ooc oorloge te vueren om tlandt van Lothrijck weder te crijghen. Ende hi quam int tlant, ende creech goet ende renten vanden lande. Ende hi pijnde hem godeuaerts vrienden te crencken daer hi conde. Godeuaert dit vernemende so track hi met machte te paerde ende te voete ende belach dye stadt van sint Truyen, om dat hy verstaen hadde dat die poorters Henricx van Limborchs vrienden waren, ende be-

[fol. 110r]

stormdense seer vreeslick ende menichwerf. Die borghers van binnen siende dat hem Henrick van Limborch en dede gheen ontset so hi belooft hadde soe werden si beraden hem op te gheuen behoudelic lijf ende goet. Ende Godeuaert namse in gracien ende quam met macht in die stadt verstellende de wet ende alle dat regiment van sijnentwegen ende verdreef daer wt die hem beliefde ende daer wert hi ontfangen ende ghehuldt als here Ende van daer track hy met grooter machte binnen Aken ende daer sadt hi twee dagen in des keysers stoel ende liet hem dair in formeren ende condighen die renten ende heerlicheden toebehorende den hertochdom van Lothrijke Ende hi bedwanc die poorteren vander stadt datse aen hem vielen, af slaende den voorscreuen Henrick van Limborch. doen keerde godeuaert thuys met eeren

¶ Hi orlochde ooc op de grimbersche tot cleenen profijte want si weder cregen tghene dat sijn vader op hem ghewonnen hadt. Jn dien tijde so daude omtrent Louen honich. Als dese twede gouaert gheregneert had drie iaren ende eenhalf, so sterf hi achterlatende een sone min dan een iaer out die heet Gouaert in die wiege. Ende hi wert begrauen te Loouen in sinte Peeters kercke ter zuytsiden alsmen screef .ix. C. ende .xliij.