Van Brabant die excellente cronike

Dat .xxvij. capitel. Van Gerberga grauinne van Louen ende Bruessel,
ende van Lambrecht metten baerde haer man
Ende vanden anderen grauen van Louen ende Bruessele tot Godeuaert met den baerde toe

DJe voorscreuen Gerberga hertogen Karels dochter ende hertogen Otto suster had getrout Lambrecht gheheten metten baerde des grauen broeder van Henegouwe. Welcke Lambrecht hadde eenen groten strijt teghens bisscop Balderijck van Ludick tot Hoegaerden daer hi victorie had Ende daer werden veel edele ende ander inden strijt verslaghen die die bisscop dede halen tot Ludick ende daer begrauen Daer dede hi een abdye maken in dye eere van sinte Jacob daer hi ooc sijn sepulture koos

Jtem daer na so nam een dye selue Lambrecht ooc oorloghe teghen Godevuaert van Ardennen, dien dye keyser Lothrijc ghegeuen had, twelck hem onrecht dochte ende wilde dat benemen, So dattet quam tot eenen strijt bi Floriues daer seer gheuochten wert aen beyden siden, mer Godeuaert hadde victorie, ende Lambrecht die bleef daer verslagen met veel andere. Als dan Godeuaert met zege weder keerde so quam Reynier die graue van Henegouwe, des voorscreuen Lambrechts broeders sone ende veruolchde Godeuaert hem doende grote schade in die steerte sijns heyrs Ende daer dese graue Lambrecht aldus doot bleef so geschiede daer een wonderlic teeken, want hi aen sinen hals droech heylige reliquien oft heylichdom om in striden ende ander tegenspoet bewaret te sijn Soe sprongen die reliquien van sijnen halse van selfs ende vloogen op een houele Twelc een ridder mercte dye namse ende berchdese in sijn coussen. Maer ter stont so wert sijn been swellende totdat hi bi rade die reliquien wech dede ende weder gaf. Dit gheschiede int iaer .M.xiiij.

Dese graue Lambrecht hadt een sone achter gelaten van sijnre vrouwen

[fol. 98r]

Gerberga dye Henric heete die oude graue van Louen ende Bruessel ende marcgraue des heilichs rijcx. Ende Gerberga sijn moeder leefde een wile na haren man ende wert ooc begrauen te Nyuele daer haren name op ghescreuen stont.

Omtrent dese tijt sachmen wonderlijcke teekenen inder lucht. Die maen verwandelde al bloedich ende twas grote aertbeuinghe ende groten dieren tijt Jn Lothrike storte een fonteyne bloet wt. Daer na wert een grote sterfte bi na ouer alle die werelt so dat die leuende ouermits dat verdriet van menichfuldigen doden neder vielen ende werden ooc begrauen

Die voorscreuen graue Henrich Gerbergensone liet achter een sone gheheten Lambrecht ende een dochter die Machtelt heet die namaels troude den graue Eustachius van bonen. Ende si hadde van hem een sone die oec Eustachius hete graue van Bonen Ende noch hadt si een sone van hem die ooc Eustachius heet graue van Bonen, ende die nam te wijue sinte Jden die dochter was van Godeuaert van Ardennen ende van lothrijcke Goselijns sone ende si was moeder van hertoge Godeuaert van billioen, daer voor af gheseyt is

Die voorscreuen Henrick die oude graue van Louen sterf int iaer ons heren .M. ende .xlvi.

Doe wert Lambrecht Henricx sone graue ende marcgraue na sijn vader ende nam tot eenre huysurouwen Oeden hertoge Goselijns dochter van Lothrike Dese graue lambrecht stichte .ij. canonisien, te weten te Bruessel ter plaetsen die heet sinte michiels berch ende heet nv tot sinte Goedelen, die ander tot sinte Peters te louen Ende dese Lambrecht ende sijn huysurouwen metten eerweerdigen deuoten bisscop Geraert van Camerijck verdroegen sinte goedelen van sinte Gorijcx kercke totter hooft kercken van sinte Michiels Desghelijcx so verhief dese goede bisscop in dier tijt met graue Lambrecht sinte Wyden van Anderlecht Ten lesten wert graue lambrecht verslagen in eenen groten strijde voor Doornic ende wert oec begrauen te Nyuele alsmen screef .M.liiij.

Ende hi liet achter een sone die Henric heet ende wert graue ende marcgraue na sijn vader Ende hi had in een strijt gheuangen een edel man die Herman hete, dien hi bracht tot Louen op sijn hof geuangen ende liet hem daer op sijn sekerheit gaen Mer bi nacht quam Herman subtilic tot graue Henric daer hi sliep ende vermoorde hem iammerlic in sijn bedde ende doe ontliep hi Dit geschiede als men screef .M.lxviij.

Dese graue Henric liet achter eenen sone die ooc Henric heet ende was graue ende marcgraue na sijn vader. Ende in sijnen tijt begonst dat clooster ende abdije van Haffligem alsmen screef .M.lxxxvi. Ende als men screef .xi.C.xxiij. so begonste sinte Michiels cloostere tot Antwerpen

Dese Henric had ghetrout des hertogen suster van Doringhen daer hy twee sonen af had. Deen heet Henric die na sijn vader regneerde, ende ten lesten wert hi oock verslagen in eenen strijt voor Doornijke ende wert gebracht te Nyuele daer hi ooc begrauen wert Jnt iaer .xcvi Die ander sone heet godeuaert metten baerde die wert graue ende marcgraue na sinen broeder

Omtrent dese tijt began die heilige

[fol. 98v]

ordene vanden Carthusers ofte Chartroysen die in strangicheyt van leuen alle ander ordene te bouen gaende is also sinte Bernaert seyt, ende hi heetse die alre schoonste calompne der heiliger kercken, wantse noyt en viel van haren opsette Ende si wert bi wonderlike tekenen begonnen int bisdom van Grenoble van meester Bruno een heilich doctor van Parijs met ses ander eerwerdige mannen. Doe leefde die heylige man sinte Huge bisscop van Grenoble die in .liij. iaren noyt vrouwen aensichte en sach dan alleen een arme weduwe hoe wel hi nochtan dagelicx allen menschen raet ende hulpe gaf ende biechte hoorde Ende namaels ontfinc hi ooc dat habijt vander ordenen van sinte Bruno voorseit

Jtem in dese tijt werden gedoot tot Jherusalem .xi.M. pelgrims vanden Arabianen

Jtem oec wast groten vloet van water bouen maten ende grote pestilencie so dat die menschen verbranden swart als koolen Ende ooc wast groten dieren tijt Ende .xv. daghen lanck vloeyde een fonteyne al bloet