Van Brabant die excellente cronike
(2016)–Anoniem Alderexcellenste cronyke van Brabant, Die–
Auteursrechtelijk beschermd | |
[Folio 88v]
| |
LOdewijc die goedertieren des groten Karels sone ende coninc van Aquitanien wert na sijn vader ende na die doot van sinen voorscreuen broeder keyser ende coninc van Vrancrijcke ende van Jtalien. Almanien ende hertoge van Brabant te weten int iaer ons heren .viij.C.xv. Dese keyser Lodewijc bedwanc inden eersten die Gascongers, die engelsche ende voort de sarasinen die den hooftstadt genoemt Cesar augusta in genomen hadden te staen tot sijnder obediencien ende gehoersaemheyt. Van desen Lodewijc seit meester Huge van Flory dat hi was dye goedertierenste man daermen af leest Ende hi was wel geleert inder wet gods ende een deuoot onderhouder der geboden gods eerende ende bescuddende die heylige kercke Ende onder ander so stichte hi dat clooster vanden regulieren te Bruessel op Couwenberch dat doe in Sonien was
Dese goedertieren Lodewijc vergaderde een consilie van veel bisscopen ende ander prelaten, daer ghetracteert wert vander reformatien der clergien ende des gemeynen goets Ende daer af wert een schoon boeck gemaect ende gecondicht inhoudende veel salige loyen ende ordinancien Ooc so thoonde hi wel sijn duecht in dien dat hi alle sijn lant door sandt wijse mannen om recht te doen sonderlinge die verdruct waren als wesen, weduwen ende meer ander Ende dat onrechtueerdelic gedaen was dede hi op rechten Ja ooc van tgheen daer hi in misdaen hadde daer af dede hi openbaer penitencie, nauolgende die zeden vanden goeden keyser Theodosius
Jtem hi hadde .iij. sonen van sijnre eerster coninghinne gheheeten Ermgaert, te weten Lotharijs, Pippijn, Lodewijc Ende van sijn tweede huysvrouwe Judith geheten had hi eenen sone die heet Karel die Caluwe Jnt vi. iaer van sinen rike so vergaderde dese goederteren coninc Lodewijc tot Aken in sijn sale een consilie van bisscopen, abten ende prelaten Ende daer wert die heylige scriftuer verclaert ende geordineert hoe die religiose ende geoordende menschen leuen souden, ende die regule vanden clercken moniken ende nonnen wert daer in ghescrifte gestelt om te bat gehouden te werden Jnt .xi. iaer sende hi Lotaris sijn sone in Jtalien om tlant te regeeren, mer Lotharis dede onghetroulic, want hi reysde te Rome anden paus Paschalis ende dede so veel dat hi vanden paus keyser ghewijet was opten heyligen paesch dach Twelc sijn vader vernemende te Rome waert reysde, ende daer sijnde ondersocht hi wie si waren die sinen sone desen raet ghegeuen hadden, de welcke hi doden dede Ende wantmen op den paus ooc quaet vermoeden hadde so moste hi hem daer af purgeren met sinen eede, ende des ghelijcx veel bisscoppen met hem
Als Lodewijc .xv. iaer keiser had geweest so quam hi tot groot liden ende tribulacie, want sijns selfs kinder ende de heren van vrancrijke ende ooc vanden keyserijcke werden tegen hem wederspannich, conspiratie makende so dat hi twee iaren in liden was Mer bider hulpen gods so veriaechde hi die somige van sinen ongetrouwe heren, ende de somige beroofde hi van haren goede ende pijndese andersins met langmoedicheyt | |
[Folio 89r]
| |
Corts daer na vernam hi dat Judith sijn vrouwe ende keiserinne sake was van alle desen quade ende daer om verdreef hise van hem Daer na ghinc si als een ongetrou wijf ende maecte noch meerder conspiracie tegen haren here met sinen kinderen ende ongetrouwe heren die dat volc tot hem trocken so dat die keyser ende coninc Lodewijc verraden wert ende quam in dye macht van sijnen kinderen die hem deden veroordelen vanden biscopen dat hi wapenen ende dat regiment af leggen soude ende besloten te werden om penitentie te doen Mer binnen den seluen iare dat hi aldus besloten was ende hem de grote oneer gedaen was so beroudet sinen lieden ende si lieten hem wt, restituerende hem weder in sinen eersten staet Ende also dwanc hi doe Lotharis sinen outsten sone dat hi nemmermeer tegens hem steken en dorste. Jn des goedertieren keysers ende conincs tide so vertoonde haer een alte grote ende vreeslijke comete, daer die keyser veruaert af was ende sprack daer aff met Egmardus den philosophe, seggende datse betekende veranderinge van enen conincrijke ende eens princen doot Mer want hi den goeden keyser niet bedroeuen en wilde so antwoorde hi hem sachtelic seggende twoort vanden prophete En wilt niet vresen die tekenen der hemelen. etcetera. Daer op antwoorde de goedertieren keyser ende coninck aldus Wi en sullen niemant vresen dan den ghenen die onse ende deser sterren scepper is, mer sijnre goedertierenheit sijn wi sculdich te louen die onse traecheyt (dair wi sondaren in sijn) gheweerdicht te vermanen met alsulcke teekenen. So verdiende die ootmoedicheit des goedertieren keisers ende conincx voor gode dat dese plage ouer hem niet en quam, mer in Jtalien daer die sarasinen in quamen ende si creghen Rome ende maecten haer stallen inder apostolen kerck. Mer dese goedertieren Lodewijc met groten volc verdreef die ontallike menichte der Sarasijnen niet sonder bloetstortinge der kerstenen Doe lodewijc .xxv. iaer keyser hadt geweest so ontboot hi tot hem te comen den seluen Lotharis sinen outsten sone ende liet hem versoenen tegen sinen vader ende hi gaf hem ouer dat regimente ende beual hem dat keyserijck. Ende int iaer daer nae, te weten, Jnt iaer ons heren .viij.C. ende .xli. so sterf dese goedertieren Lodewijc ende wert eerlicken begrauen te Mets in oostvrancrijcke in sinte Arnouts kercke bi sijnder moeder Hildegaerde ende veel ander edelen van sinen gheslachte. Van desen lodewijc sijn dese veersen Jste Brabantinus dux septimus austrasiorum. Et pius Augustus possedit plurima regna
|
|