Dat .xij. capitel Van hertoge Grimoalden den tweeden hertoge van Brabant
ALs voor geseyt is so hadde sinte Pippijn van Landen van sinte Jtte drie kinderen, te weten sinte Geertruyt, sinte Begghen ende Grymoalde die hertoge wert na sinen vader ende die meeste regeerder des huys van Sigibertus coninc van oostvrancrijc voor genoemt gelijc sijn vader grote vrientscap ooc houdende met sinte Cumbertus eertsbisscop van Colene. Ende bi Grimolts rade so dede coninc Sigibertus fonderen veel schone cloosteren in Ardennen ende elwaerts, als te Stabalaus ende Malniumdarium ende meer ander Ende dese twee cloosteren betimmert sijnde so gafse hertoghe Grymolt in handen den heiligen Remaclus om die heylighe religie daerin te stellen. Ende vliedende sinte Remaclus dye onlede der wereltliker dingen ende sinte Theodardus latende sinen nauolger inden bisscopliken stoel van Tongheren so vercoos hi gode al daer in eenicheden te dienen
Na die doot vanden voorseyden coninc Sigebert so wert hertoge Grimoalt mits hate ende nijt van sommige heren die sijn grootheid beniden verslagen ende vermoort, ende hi wert begrauen tot Joppilien bi Herstalle Somige scriuen dat Grymoaldus meende aen hem te trecken die crone van oostvrancrijcke, wtslutende Sigebertus sone die noch ionck was ende dien hi ter scolen geleyt hadde. Ende dat die oostvrancken Grimoalden daer om vingen ende leuerden hem den coninc Clodoueus die coninc was in west vrancrijcke des voorseiden Sigebertus broeder, ende doe leyde hi hem in een geuangenisse daer hi in sterf. Ende so quam dat lant van Brabant op Beggen sijnre susteren
Coninc Clodoueus die tweede van dien name coninc van vrancrijck die had een alte heyligen ende ootmoedigen coninginne gheheten sinte Batildis, die de symonie ende onredelike scattingen (die dat volc seer verdructen) wten conincrijke verdreef Ende si stichte veel cloosteren als Corbie ende meer ander helpende ooc veel lieden te clooster Ende si dede veel aelmissen der kercken ende den armen, ende ten lesten gincse selue in dat clooster van Kale, ende was die alder minste in die cueken dienende ende alle onreynicheyt cuysschende ende wasschende Ende ten lesten so sterf si met hemelsche teekenen
Auteursrechtelijk beschermd