Dat .xi. capitel Vanden leuen van sinte Jtten des voorseyden Pippijns huysurouwe
ALs sinte Jtte anders gheheeten Jduberghe weduwe was ende sinte Pippijn haer man vander werelt ghescheyden was, so wert si beraden in reynen weduweliken state gode te dienen Van vele edele heren wertse versocht te huwelike, so om hair duechdelike zeden ende edelheit, so om haer rijcdom, mer si wederstont al ende bleef gestadich in haren opsette So gebuerdet dat die heylige bisscop sinte Amande tot haren huse quam om haer te troosten dien si blidelic ontfinc. Ende gaf hem te kennen dat opstette hairs herten, begherende van sijnre hant te ontfangen dat heylige wijl, in teeken der reynicheyt Twelc aenhorende sinte Amandus so sloech hi sijn handen opwaerts ten hemel gode danckende want hi dair om tot haer gecomen was om haer daer toe te vermanen Ende so dede sinte Jtte die ghelofte van reynicheyt, verbindende haer tot gods dienste ende haer tijtlic goet gode op dragende, ende si veranderde haer hof te Nyuele ende maecte daer af een kercke Daer na onder den dienst der missen so ontfinc si van sinte Amande den heyligen wijl ende dat habijt der religien ende wert een vanden getale der nonnen die sie daer om gode te dienen geordineert ende voorsien hadde Jn welcken state si gode diende al haer leuen lanck met haer dochter sinte Geertruyt Si was seer ootmoedich, goedertieren, gestadich, langmoedich, hair seluen oeffenende in vasten, waken, wtstortinge der tranen ende heylige meditacien, so dat si den anderen heyligen maechden een leuende exempel was van duechden Also veel aelmissen gaf si den armen als haer goeden strecken mochten Ende den armen ende ellendigen menschen quam si te hulpe haer voeten wasschende ende ander wercken der ontfermherticheden volbringende also dat si ooc van haers goeden mans tiden gedaen hadde, int welc si volherde na sijn versceyden .xij. iaren lanc. Ende ten eynde van dien so verscheyde si van deser werelt
Auteursrechtelijk beschermd