Van Brabant die excellente cronike

Dat .xxxiij. capitel. Van broeder Thomas die compositoer des boecx vander Byen.

INden tiden vander voorseider heiligher Lutgaert ende vanden derden hertoge Henric van Brabant so leefde in Brabant dye vierighe minnaer der menschen salicheit ende een groot predicare broeder Thomas geheeten van Cantypre, van edelen geslachte geboren tot Leeuwe bi bruessel Die welc ginc inder ordenen vanden predicaren ende wert supprior int conuent te Louen Ooc so wert hi gecoren penitentiarius om te horen biechte. welck officie hi hanteerde wel .xxx. iaren lanck in verscheyden bisdommen Mer want hi noch ionc was ende alrehande sondaren biecht begonste te horen, so wert hi wten horen met swaer temptatien ghequelt van binnen Ende mits dien seer verslagen sijnde in hem seluen so ghinc hi totter maghet Luytgaert van Ewyers als tot sijnre gheesteliker moeder die doe ter tijt noch leefde ende gaf haer den last sijnre herten te verstane. Doen si dat verstont soe keerde si tot haren ghebede twelc ghedaen sijnde so sprac si tot hem aldus Sone keert weder om tot uwer plaetsen ende arbeyt om die sielen te winnen Christus sal bi v sijn een bescermere ende ooc een leeraer, die in biechte te horen v mogentliken verlossen sal van den fellen geschutten der boser duuelen ende sal vermeerderen in v sijn gracie. Van dien daghe voort soe beuant hi dye prophecie van Lutgaerden in hem warachtich, want hoe hi onreynder dingen inder biechten hoorde, hoe dat hi min daer op achte. Ende in hem vermeerderde voort aen den geest der wijsheit ende der kennissen gods

Also dese broeder Thomas noch een ionc kint was so plach hem sijn vader met tranen ende met deuocien te vermanen tot studeren ende tot gheesteliken leuen ende seyde aldus O mijn beminde sone als ic ouer die zee ghereyst was om te visiteren Jerusalem ende dat heylich lant, so quam ic ter plaetsen gheheeten den swarten berch, daer veel heremiten in verscheyden cellen gode dienden Ende van eenen van hen lieden daer ic mijn sonden tegens biechte so ontfinc ic voor een antwoorde dat ic mijn sonden met penitentien niet lichteliken en soude connen af gewasschen, mer had ic een sone den welcken ick ter leeringen

[fol. 35r]

stelde ende dat hi een goet bequaem priester werde, so mocht ic door hem werden gheholpen Ende door desen raet so plach Thomas als hi priester gheworden was openbaerlic in sijn sermoen ende ooc heymelic ghebet voor sijns vaders siele te eysschen ende in veel manieren hem te helpene Ende als hi somwilen voor sinen vader geen misse en dede als hi belet was so sach hi sijn vader inden slape hem verthonende schinende al doorwont, sijn handen wtreckende ende hem beclagende dat hi sinen vader niet en hielpe

Dese weerdige Thomas heeft bescreuen in claren sermoene dat leuen vander heyligher maghet Lutgaert voorseyt, ende dat leuen vander wonderliker Cristinen van Sintruyen. Oec heeft hi gescreuen den boeck vander natueren der dinghen, dair hi .xv. iaren ouer arbeyde Ende voort den boeck van den prelaten ende ondersaten gheheten den boeck vanden Byen, daer hi veel in ghescreuen heeft van schonen ende loofliken dingen weerdich te gedincken die in sinen tijde in Brabant gheschieden, ende van heylige ende weerdige personen die hi ghesien heeft